राज्यात नववर्ष स्वागताची तयारी उत्साहात सुरू आहे. नववर्ष स्वागतासाठी लाखो पर्यटक गोव्यात आले असून राज्यातील हॉटेल, समुद्रकीनारे विविध पर्यटनस्थळांवर गर्दी होताना दिसत आहे. गोव्यात पर्यटनासाठी काही पर्यटक खासगी गाड्यांचा वापर करतात तर काही पर्यटक कदंबचा वापर करतात. गोव्यात स्थानिकांना तसेच पर्यटकांना आरामदायी, प्रदुषणविरहीत प्रवास करता यावा यासाठी कदंब महामंडळाने इलेक्ट्रिक वातानुकीलीत बसेसची सेवा सुरु केली आहे.

दरम्यान आज दुपारी मडगाव बस्थानकात कदंब महामंडळाच्या इलेक्ट्रिक वातानुकीलीत बसच्या तिकीट वरुन कदंब कर्मचारी व पर्यटक यांच्यात खडाजंगी पहायला मिळाली. यावेळी पर्यटक प्रवाशांनी संतप्त प्रतिक्रिया व्यक्त केल्या. पुरेशा एसी बसेस असतानाही पर्यटकांना तिकीट देण्यास नकार दिल्यामुळे हा प्रकार घडल्याचे यावेळी उपस्थित प्रवाशांकडून सांगण्यात आले. या घडलेल्या प्रकारबाबत समाजमाध्यमांवर व्हिडीओ व्हायरल झाला आहे. त्यामुळे कदंबा प्रशासनाने घडलेल्या प्रकाराची दखल घेण्याची गरज आहे.

गुरुवारी सायंकाळी पणजी बसस्थानकावर खासगी बस व इलेक्ट्रीक कदंबा यांच्यात अपघात झाला होता. या अपघातामुळे मात्र प्रवाशांना त्रास सहन करावा लागला. यावेळी प्रवाशांनी खासगी बसचालकांच्या मुजोरीवर संतप्त प्रतिक्रिया दिल्या. सुदैवाने या अपघातात कोणताही प्रवासी जखमी झाला नाही. खासगी बसेस कुठेही स्टॉप मारुन प्रवाशांना उतरवतात, तसेच त्यांना हवे तिथे बसेस पार्क करतात अशा कारणांमुळे हे असे अपघात वारंवार घडत असतात अशी प्रतिक्रिया संतप्त प्रवाशांनी यावेळी व्यक्त केली.