Goa Margao Police: नाताळ व नंतर नववर्षाची सुरवात यामुळे पर्यटकांची गर्दी उसळणार असल्याने सुरक्षा व्यवस्थेची पाहणी व तपासणी करण्यासाठी पोलिसांनी मडगाव व कोलवा येथे मॉक ड्रिलचे आयोजन केले. कोलवा पोलिसांसह दहशतवादीविरोधी पथकाने कोलवा रेसिडेन्सी येथे मॉक ड्रिल केले.

कोलवा पोलिसांच्या हद्दीत केळशी ते माजोर्डा या समुद्र किनारपट्टीचा भाग येतो. तरीही कोलवा पोलिसांची कुमक वाढविण्यात आलेली नाही. या मॉक ड्रिलमध्ये सुरक्षा व्यवस्था कशी करता येते त्याचे प्रात्यक्षिक करून दाखविण्यात आले. नंतर पोलिसांनी समुद्रकिनाऱ्यावर जाऊन कोलवा पोलिस स्थानकाचे निरीक्षक थेओरन डिकॉस्‍टा व एटीएस अधिकाऱ्यांच्या मार्गदर्शनाखाली मॉक ड्रिल केले.

मडगाव पोलिसांनी पोलिस निरीक्षक तुळशीदास नाईक व एटीएस अधिकाऱ्यांच्या मार्गदर्शनाखाली मडगाव नगरपालिका इमारत तसेच न्यू मार्केट परिसरात ही मोहीम राबविली. सध्या मडगाव पोलिस बेकायदेशीर व नियमबाह्य वाहतूक प्रकरणी सर्व्हेक्षण करीत असून गेल्या दोन ते तीन दिवसांत अनेक चालकांना तालांव देण्यात आला आहे.

सुरक्षा व्यवस्थेसंदर्भात केली पडताळणी

सुरक्षा व्यवस्था कशी करता येऊ शकते व नागरिकांमध्ये आत्मविश्र्वास कसा वाढविता येईल, यासंदर्भात हे मॉक ड्रिल करण्यात आल्याचे पोलिस निरीक्षक तुळशीदास नाईक यांनी सांगितले. पुढेही ही मोहीम राबविण्‍यात येणार असल्‍याचे ते म्‍हणाले.