वाळपई: चोर्लाघाटातील जांबळी परिसरात ७ मे रोजी सायंकाळच्या सुमारास स्वयंअपघातात गंभीर जखमी झालेल्या सुर्ला (सत्तरी) येथील सूरज भिकाजी गावस (२७) याचा शनिवारी (ता.१०) सकाळी गोमेकॉत (गोवा वैद्यकीय महाविद्यालय) उपचारादरम्यान मृत्यू झाला.

प्राप्त माहितीनुसार, सूरज गावस हा वन विभागात कार्यरत होता आणि चोर्लाघाटातील जांबळी परिसरात ड्युटी करत होता. बुधवारी सायंकाळी ड्युटीवर येत असताना त्याचे दुचाकीवरून नियंत्रण सुटून स्वयंअपघात झाला होता.

या अपघातात त्याला गंभीर दुखापत झाली होती. प्रथम त्याला साखळी आरोग्य केंद्रात नेण्यात आले. मात्र, स्थिती गंभीर असल्याने पुढील उपचारासाठी तातडीने गोमेकॉत दाखल करण्यात आले. चार दिवसांपासून सूरज जीवन-मृत्यूशी लढा देत होता. मात्र, अखेर शनिवारी सकाळी त्याची प्राणज्योत मालवली.

या प्रकरणाचा तपास वाळपई पोलिस करत असून, अपघाती मृत्यूची नोंद करण्यात आली आहे. दरम्यान, या अपघाती मृत्यूमुळे सुर्ला गावात शोककळा पसरली आहे. सर्वत्र हळहळ व्यक्त केली जात आहे.