वास्को: मुरगाव पालिकेच्या उपनगराध्यक्षपदासाठी उद्या (29 रोजी) निवडणूक होणार असून अमेय चोपडेकर यांची निवड निश्‍चित झाली आहे. प्रभाग 18 चे नगरसेवक चोपडेकर यांचा एकमेव अर्ज आज मुख्याधिकारी जयंत तारी यांच्याकडे आल्याने त्यांची उपनगराध्यक्षपदी बिनविरोध निवड होणार असल्याचे निश्‍चित आहे. (Mormugao Municipal Council News Updates)

श्रद्धा महाले यांनी 15 मार्च रोजी मुरगावच्या उपनगराध्यक्षपदाचा राजीनामा दिल्यानंतर रिक्त असलेली जागा भरण्यासाठी पालिका संचालक कार्यालयाने उद्या मुरगावचा नवीन उपनगराध्यक्ष निवडण्यासाठी बैठक बोलावली आहे. उपनगराध्यक्षपदासाठी इच्छुकांनी आज (२८ मार्च) उमेदवारी अर्ज सादर करावेत, असे पालिका संचालक कार्यालयातर्फे कळवण्यात आले होते.

वास्कोचे आमदार कृष्णा साळकर यांचे समर्थन असलेले नगरसेवक चोपडेकर उपनगराध्यक्ष बनणार असल्याची चर्चा आधीच रंगू लागली होती. विधानसभा निवडणुकीत वास्कोत पराभूत झालेले कार्लुस आल्मेदा यांचे समर्थन असलेल्या उपनगराध्यक्ष श्रद्धा महाले यांच्याविरुद्ध 25 पैकी 16 नगरसेवकांनी अविश्‍वास ठरावाची नोटीस पालिका संचालकांकडे सुपूर्द केली होती. 14 रोजी 16 नगरसेवकांनी अविश्‍वास ठरावाची नोटीस जारी केल्यानंतर अविश्‍वासाचा निर्णय जाणून घेण्यासाठी बोलावण्यात आलेल्या बैठकीला न थांबता महाले यांनी पदाचा राजीनामा दिला.

आज पालिका सभागृहात बैठक

रिक्त झालेल्या उपनगराध्यक्षपदासाठी उद्या सकाळी 11 वाजता पालिका सभागृहात बैठक होणार आहे. मुरगावचे उपजिल्हाधिकारी दत्तराज गवस देसाई निर्वाचन अधिकारी म्हणून काम पाहणार आहेत. या बैठकीत फक्त औपचारिकता बाकी आहे.