पणजी: युनिटी मॉलसाठी जागा अधिग्रहीत करताना चिंबल पठारावर ‘तोय्यार तलावा’च्या जवळील जमिनीवर खोदकाम केले होते. ती जमीन सात दिवसांच्या आत पूर्ववत न केल्यास नव्याने आंदोलन छेडण्याचा इशारा गुरुवारी (ता.१६) चिंबलच्या ग्रामस्थांनी दिला.

याबाबतचे निवेदन उपजिल्हाधिकारी प्रवीण परब यांच्याकडे सादर केले. जिल्हाधिकारी कार्यालयावर गुरुवारी चिंबल ग्रामस्थांनी धडक दिली. गोविंद शिरोडकर, अजय खोलकर यांच्या नेतृत्वाखाली शिष्टमंडळाने जिल्हाधिकारी कार्यालयावर येऊन निवदेन सादर केले.

उपजिल्हाधिकारी परब यांनी कार्यालयाबाहेर येऊन निवेदन स्वीकारले. यावेळी खोलकर म्हणाले की, ‘तोय्यार’ तलावापासून काही अंतरावर ही जागा आहे. त्यामुळेच युनिटी मॉलला ग्रासस्थांनी विरोध केला होता.

उपजिल्हाधिकाऱ्यांना निवेदन सादर

शिष्टमंडळाने सादर केलेले निवेदन उपजिल्हाधिकारी प्रवीण परब यांनी स्वीकारले. त्यावर परब म्हणाले, हे निवेदन वरिष्ठांना दाखविले जाईल आणि पुढील कार्यवाही केली जाईल. सर्व नागरिकांनी येथून हटावे, अशी विनंतीही त्यांनी केली. याप्रसंगी प्रवेशद्वारावर पोलिसांचा बंदोबस्त होता.