Children's Film Festival : सासष्टी, मडगावच्या रवींद्र भवनमध्ये गोव्याच्या माहिती व प्रसिद्धी खात्याच्या सहकार्याने अंतरंग क्रिएशन्सने आयोजित केलेल्या ‘बुलबुल’ आंतरराष्ट्रीय बाल चित्रपट महोत्सवाला बुधवारी (ता.१०) दुसऱ्या दिवशी भव्य प्रतिसाद लाभला.

शेकडो मुलामुलींनी व त्यांच्या पालकांनीही बरीच गर्दी केली होती. यावेळी सर्वच स्क्रीनवर वेगवेगळ्या भाषेतील चित्रपट पाहण्यासाठी मुले उत्साहित होत असल्याचे चित्र दिसत होते.

शिवाय चित्रपटाव्यतिरिक्त खुल्या मैदानावरील डिजिटल प्लेनेटोरियम तसेच चित्रपटाची चित्रिकरण प्रात्यक्षिके पाहण्यास मुलांची जास्त गर्दी दिसत होती.

सायंकाळी नकलांचा कार्यक्रम सादर करण्यात आला. गुरुवारी (ता.११) तिसऱ्या दिवशी खुल्या रंगमंचावर तीन लघुपट दाखविण्यात येतील. शिवाय सकाळी १० वाजता पालकत्वावर कार्यशाळा आयोजित करण्यात आली आहे.