Panaji solar City : राजधानी पणजी शहराची ओळख ‘सोलर सिटी’ म्हणून करण्यासाठी येत्या 2 वर्षांत शासकीय व खासगी उपक्रमांतून शहरासाठी लागणारी 80 मेगा वॅट सौरऊर्जा निर्माण करणार असल्याची माहिती मुख्यमंत्री डॉ. प्रमोद सावंत यांनी शुक्रवारी (ता.17) दिली.

केंद्र आणि राज्य सरकारच्या ‘गेडा’ संस्थेकडून राबविण्यात येणाऱ्या या प्रकल्पाचे शुक्रवारी मुख्यमंत्र्यांच्या हस्ते अनावरण करण्यात आले. यावेळी महसूलमंत्री बाबूश मोन्सेरात, भाजप प्रदेशाध्यक्ष सदानंद शेट तानावडे आणि या प्रकल्पाचे समन्वयक सचिव अजित रॉय उपस्थित होते.

सौर शहराचा दर्जा प्राप्त करणे हे राज्याचे शाश्वत विकास लक्ष्य साध्य करण्याच्या दिशेने आणखी एक पाऊल आहे, असे प्रतिपादन मुख्यमंत्र्यांचे सचिव अजित रॉय यांनी केले.

"या उपक्रमासाठी सरकारी इमारतींवर सोलर पॅनल बसविण्यात येणार आहेत. ज्या व्यावसायिक आस्थापने, कॅसिनो इत्यादींसाठी छतावर सौरऊर्जा निर्मिती करणे शक्य नाही ते इतर कोणत्याही ठिकाणी सौरऊर्जा निर्मितीचा पर्याय निवडू शकतात आणि त्यातून निर्माण होणारी वीज ग्रीडमध्ये हस्तांतरित केली जाईल."

- डॉ. प्रमोद सावंत, मुख्यमंत्री