Noise pollution हणजूण तसेच वागातोरच्या किनारी भागात ध्वनिप्रदूषण करून स्थानिकांची झोपमोड करणाऱ्या वागातोर येथील कॉफे-ला म्युझिका आणि हणजूण येथील सॉसो या रेस्टॉरंटच्या व्यवस्थापकाविरोधात हणजूण पोलिसांकडून रितसर चार्जशीट दाखल करून घेण्यात आली आहे. त्यामुळे कायद्याचा भंग करून ध्वनिप्रदूषण करणाऱ्या अनेकांचे धाबे सध्या दणाणले आहे.

दरम्यान, 12 जानेवारी 2023 रोजी हणजूण पंचायतीचे तलाठी असलेल्या गौरीश नाईक यांच्याकडून वागातोर येथील कॉफे-ला म्युझिका आणि हणजूण येथील सॉसो बार ॲण्ड रेस्टॉरंटच्या विरोधात कायद्याचे उल्लंघन करीत रात्री उशिरापर्यंत जोरात संगीत वाजवून परिसरात ध्वनिप्रदूषण करत असल्याची रितसर तक्रार राज्य प्रदूषण नियंत्रण बोर्डाच्या कार्यालयात दाखल करण्यात आली होती.

तथापि, संबंधित बोर्डाच्या अहवालानुसार, म्हापसा पोलिस उपअधीक्षक जीवबा दळवी यांच्या मार्गदर्शनाखाली कारवाई करताना हणजूण पोलिसांकडून तक्रारीत नमूद करण्यात आलेल्या कॉफे- ला म्युझिका रेस्टॉरंट यांच्या ताब्यातील म्युझिक सिस्टीम पोलिसांकडून जप्त करण्यात आली.

यावेळी संशयित विजय अरौरा तसेच सुदीप्ता घोष (दोघेही कॉफे-ला म्युझिकाचे मालक तसेच व्यवस्थापक) यांना राज्य प्रदूषण नियंत्रण बोर्डाच्या कायद्याचे उल्लंघन केल्याच्या कारणांवरून ताब्यात घेण्यात आले.

दुसऱ्या घटनेत हणजूण पोलिसांकडून सॉसो बार व रेस्टॉरंटचे मालक तसेच व्यवस्थापक असलेल्या संशयित दीपांश सुभाष बजाज, मोहक सुभाष बजाज आणि सुरेश जयचंद रामोला यांच्या विरोधात ध्वनिप्रदूषण कायद्याचा भंग केल्याच्या आरोपावरून कायदेशीर चार्जशीट दाखल करण्यात आली आहे. म्हापसा पोलिस उपअधीक्षक जीवबा दळवी यांच्या मार्गदर्शनाखाली पुढील तपास सुरू आहे.