पणजी : टेक्सास प्रांतातील ह्युस्टनमध्ये गोव्यातील चांदर गावातील तरुणाची गोळ्या झाडून हत्या करण्यात आली. गोवा सरकारने त्याचं पार्थिव परत आणण्यासाठी प्रयत्न सुरु केले आहेत. यातच आता आणखी एक बातमी समोर आली आहे. अमेरिकेतील पोलिसांनी जॉन डायस या गोमंतकीय तरुणाच्या मारेकऱ्याची माहिती देणाऱ्याला 5 हजार डॉलरचं बक्षीस जाहीर केलं आहे.

गोव्यातील एनआरआय कमिशन अमेरिकेतील भारतीय दुतावासाच्या संपर्कात आहे. चांदर येथील तरुण जॉन डायसच्या मृतदेहाला परत मिळवण्यासाठी गोवा सरकारसह एनआरआय कमिशनचे प्रयत्न सुरुच आहेत. आता अमेरिकेतील पोलिसांनीही जॉनच्या हत्येचा (Murder) छडा लावण्यासाठी कंबर कसली आहे. अमेरिकेतील माध्यमांनी दिलेल्या वृत्तानुसार एक मास्कधारी व्यक्ती बराच वेळ जॉन काम करत असलेल्या गॅस स्टेशनच्या बाहेर घुटमळत होता. काळ्या रंगाचे कपडे आणि हुडी घातलेल्या व्यक्तीने अचानक दुकानात प्रवेश केला आणि काऊंटरवर असलेल्या जॉनवर गोळ्या झाडल्या. जॉनची हत्या करुन मास्कधारी व्यक्ती दुकानातून पळून गेल्याचं सीसीटीव्हीमध्ये दिसत असल्याचंही अमेरिकी माध्यमांमध्ये प्रसिद्ध झालं आहे.

दरम्यान गोव्यातील धार्मिक आणि सामाजिक कार्यकर्त्यांनी जॉन डायसच्या कुटुंबाला मदतीचा हात पुढे केला आहे. ह्युस्टनमधील पोलिसांनीही (Police) डायस कुटुंबाला आश्वस्त केलं आहे की ह्युस्टन त्यांच्यासोबत आहे आणि जॉनला न्याय मिळवून देण्यासाठी प्रयत्नशील असल्याचं सांगितलं आहे. तीन वर्षांपूर्वी अमेरिकेत कामाच्या निमित्ताने गेलेल्या चांदरमधील तरुणाला ह्युस्टनमध्ये गोळी झाडून हत्या केल्याने सर्वत्र हळहळ व्यक्त केली जात आहे. जॉन हा एक चांगला फुटबॉलपटू होता. दक्षिण गोव्यातील चांदर आणि गिरदोली येथील क्लबसाठी तो पूर्वी गोलकिपिंग करायचा. मात्र रोजगाराच्या पोटी तो तीन वर्षांपूर्वी अमेरिकेत (America) गेला होता. तिथेच त्याच्यावर हा आघात झाला. जॉनच्या मृत्यूच्या बातमीने संपूर्ण चांदर गावावर शोककळा पसरली.