पणजी: सोनाली फोगाट प्रकरणाचा तपास करण्यासाठी मुंबईतील सीबीआय पथक आज गोव्यात दाखल झाले असून अधिकारी रेचपाल यांच्या नेतृत्वाखाली हे पथक या प्रकरणाचा ताबा हणजूण पोलिसांकडून आज घेणार आहे त्याची प्रक्रिया सुरु आहे. दरम्यान, सोनाली फोगट यांचे कुटुंबीय सुरुवातीपासूनच सीबीआय चौकशीची मागणी करत होते.

(CBI team from Mumbai reached Goa to investigate Sonali Phogat case)

यासाठी त्यांनी हरियाणाचे मुख्यमंत्री मनोहर लाल खट्टर यांची भेट घेऊन लेखी अर्ज दिला होता. त्यानंतर हरियाणाच्या मुख्यमंत्र्यांनी गोव्याचे मुख्यमंत्री प्रमोद सावंत यांना या प्रकरणाच्या सीबीआय चौकशीसाठी पत्र लिहिले होते.

कुटुंबीयांनी सीबीआय चौकशीची मागणी केली होती

दोन दिवसांपूर्वी, सोनाली फोगट यांची बहीण रुकेश यांनी सीबीआय चौकशीच्या मागणीचा पुनरुच्चार करताना बहिणीच्या संशयास्पद मृत्यूमागे राजकीय हेतू असल्याचा संशयही व्यक्त केला होता. रुकेश म्हणाल्या होत्या की, "केंद्रीय अन्वेषण विभागाच्या (सीबीआय) तपासानंतरच सत्य बाहेर येईल. गोवा पोलिसांच्या तपासावर आम्ही समाधानी नाही. गोवा पोलिस या प्रकरणाचा तपास मालमत्तेच्या कोनातून करत आहेत. या हत्येमागे राजकीय हेतू असू शकतो. मोठे लोक असू शकतात. सोनालीची हत्या राजकीय कारणावरुन झाली असावी, त्यामुळे तपास व्हायला हवा."

केंद्रीय गृहमंत्रालयाने मंजूरी दिली होती

या प्रकरणाच्या सीबीआय चौकशीसाठी सरकारवर दबाव आणल्याबद्दल कुटुंबीयांनी खाप पंचायतींचे आभार मानले आहेत. रुकेश पुढे म्हणाल्या की, "खाप पंचायतींनी पूर्ण सहकार्य केले. खाप पंचायतींमुळेच हरियाणा (Haryana) आणि गोवा (Goa) सरकारवर दबाव निर्माण झाला." सोनाली फोगट यांच्या मृत्यूची सीबीआय चौकशी व्हावी या मागणीसाठी रविवारी हिसारमध्ये खाप महापंचायतीचे आयोजन करण्यात आले होते. त्यानंतर, सोनाली यांच्या मृत्यूची चौकशी करण्यासाठी केंद्रीय गृह मंत्रालयाने (MHA) सोमवारी केंद्रीय अन्वेषण ब्यूरोला (CBI) मंजूरी दिली.