Fr Bolmax Pereira: छत्रपती शिवाजी महाराजांविषयी केलेल्या कथित वादग्रस्त वक्तव्यावरून हिंदुत्ववादी संघटना चिखलीतील चर्चचे फादर बोलमॅक्स परेरा यांच्‍या विरोधात आक्रमक झाल्या.

शुक्रवारी रात्री वास्‍को पोलिस ठाण्याबाहेर मोठ्या प्रमाणात परेरा यांच्याविरोधात गुन्हा दाखल करण्यासाठी हिंदु समुदायाने गर्दी केली होती. दरम्यान, एकीकडे वास्को पोलिस स्टेशनबाहेर ही गर्दी असतानाच दुसरीकडे वास्को चर्चबाहेर कॅथलिक युवक-युवतीदेखील फादर बोलमॅक्स यांच्या समर्थनाथ जमले होते.

चर्चबाहेर मोठ्या प्रमाणात जमलेल्या कॅथलिक युवक-युवतींनी मोबाईलच्या फ्लॅश लाईट्स लाऊन फादर बोलमॅक्स परेरा यांच्या समर्थनाथ धार्मिक गीतांचे गायनही केले. याचा व्हिडिओ शनिवारी सकाळपासूनच व्हायरल झाला होता.

काय आहे प्रकरण फादर परेरा यांनी शिवाजी महाराज हे राष्ट्रपुरूष आहेत, पण देव नाहीत. हिंदु लोकांनी त्यांना देव केले आहे, असे वक्तव्य केले होते. त्यावरून हिंदुंच्या भावना दुखवल्या होत्या. त्यानंतर शुक्रवारी सायंकाळी हिंदुत्ववादी संघटनांनी वास्‍को पोलिस ठाण्‍याबाहेर बोलमॅक्स यांच्या अटकेसाठी निदर्शने केली होती.

त्‍यामुळे तणाव निर्माण झाला होता. त्यानंतर परेरा यांच्याविरोधात गुन्हाही दाखल करण्यात आला होता. परेरा यांनी त्यांच्या वक्तव्याचा विपर्यास केला असून कुणाच्या भावना दुखावल्या असतील तर दिलगीरी व्यक्त करतो, अशा शब्दात माफी मागितलीही होती.