पद्माकर केळकर
बागायतीतील केळी, नारळ, अननस, सुपारी पिकानंतर आता खेती (माकडे) या रानटी प्राण्याने काजू पिकावर हल्ला चढवला आहे. आधीच काजू बियांना प्रति किलो रु. १११ असा अल्प दर आहे, त्यात खेत्यांकडून काजू बियांची होणारी प्रचंड नासाडी यामुळे शेतकरी हतबल झाले आहेत.
खेती काजू बिया फस्त करीत असल्यामुळे शेतकऱ्यांसमोर मोठे संकट उभे झाले आहे. नुकताच काजू हंगामाला सुरवात झाली असताना खेत्यांनी या पिकाला लक्ष बनवले आहे. नगरगाव, धावे, उस्ते, तार अशा अनेक भागातील काजू बागायतीत फिरल्यास खेत्यांनी काजू बिया खाऊन त्याची टरफले जमिनींवर पडलेली दिसत आहेत. याचा मोठा फटका बसणार असून यंदा काजू उत्पन्नात कमालीची घट होण्याची शक्यता आहे.
हंगामाच्या सुरवातीलाच काजू बियांचा दर प्रती किलो १११ रुपये असा अत्यल्प असल्याने काजू उत्पादक शेतकरी अस्वस्थ आहेत. हा दर न वाढल्यास शेतकऱ्यांना मोठे नुकसान सोसावे लागणार आहे. सद्यःस्थिती २०० रुपये प्रती किलो दर आवश्‍यक आहे, अशी शेतकऱ्यांची मागणी आहे.
हमीभावच महत्त्वाचा...
काजू बियांना प्रति किलोमागे पंधरा ते वीस रुपये त्यावेळच्या दरानुसार आधारभूत किंमत दिली जाते. याचाच फायदा घेऊन काही काजू कारखानदार हा दर कमी करून लूट करतात. त्यासाठी सरकारने प्रती किलो २०० रुपये हमीभाव द्यावा, अशी मागणी होत आहे.
काजू आयात धोरण बदला
गोव्यात ब्राझील, दक्षिण आफ्रिका या देशातून मोठ्या प्रमाणात काजू बिया आयात केल्या जातात. या काजू कमी किमतीत मिळत असल्याने गोव्यातील काजू उत्पादकांना याचा फटका बसत आहे. सरकारने काजू आयातीबाबतचे धोरण बदलणे आवश्‍यक आहे. मात्र सरकार याबाबत गंभीर दिसत नाही.
काजू बागायतीत काम करण्यासाठी लागणाऱ्या मजुरांचा पगार वाढलेला आहे. पण उत्पन्न कमी, वन्य प्राण्यांकडून नासाडी व दरही कमी यामुळे काजू पीक परवडत नाही. पदरमोड करूनही खर्च निघत नाही. त्यामुळे काजू बियांची दरवाढ आवश्‍यक आहे.- रघू गावकर, सत्तरी
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.