वास्को: कासावली–कुयेली मार्गावर सायंकाळी झालेल्या भीषण अपघातात झुआरीनगर येथील दोन युवकांचा मृत्यू झाला. वेर्णा पोलिसांनी पंचनामा करून मृतदेह शवविच्छेदनासाठी दक्षिण गोवा जिल्हा इस्पितळात पाठवले.

मृतांची नावे व्यंकटेश बासरी (२४) आणि राकेश संकाप्पान्नवर (२६) अशी आहेत. हे दोघे मूळचे बागलकोट (कर्नाटक) येथील असून कामानिमित्त बिर्ला-झुआरीनगर येथे वास्तव्यास होते.

हे दोघे दुचाकीवरून आडौलेम–कुयेली अंतर्गत रस्त्याने जात असताना एका वळणावर चालक व्यंकटेश याचे वाहनावरील नियंत्रण सुटले. त्यानंतर समोरून येणाऱ्या टुरिस्ट कारला दुचाकीची धडक बसली. या अपघातात ते जागीच ठार झाले.

अपघातस्थळी वाझ

कुठ्ठाळीचे आमदार आंतोनियो वाझ हे या मार्गाने जात असताना अपघाताची माहिती मिळताच घटनास्थळी थांबले. रस्त्यावर हॉटमिक्स केल्यानंतर वाहनांचा वेग वाढल्याचे दिसून येत आहे. मात्र, रस्ता अरुंद असल्याने वेगावर नियंत्रण ठेवावे, असे आवाहन त्यांनी केले.