Car Self Accident At Sanguem : आज दुपारी सांगे येथे एका कारचा अपघात झाल्याची घटना घडली आहे. या स्वयंअपघातात कारचे मोठ्या प्रमाणात नुकसान झाले असून सुदैवाने अपघातात कुणी जखमी झाले नाही. अपघाताची माहिती मिळताच पोलिसांनी घटनास्थळी दाखल होत घटनेचा पंचनामा केला.

दरम्यान आज पहाटे करासवाडा, म्हापसा येथील उड्डाणपुलावर एका कारला भीषण आग लागण्याची घटना घडली आहे. यामध्ये कार पूर्ण जाळून खाक झाली.

याबाबत अधिक माहिती अशी की, एका कारमधून फोंडा येथील दाम्पत्य प्रवास करीत होते. त्यांची कार दांडो, सांगे येथे दिवाणी न्यायालयाजवळ आली असता कार स्लीप होऊन कारवरील चालकाचे नियंत्रण सुटल्याने कार विजेच्या खांबाला धडकली. या स्वयंअपघातात सुदैवाने कोणी जखमी झाले नाही.

मात्र, या अपघातात कारचे मोठ्या प्रमाणात नुकसान झाले असून पोलिसांनी घटनास्थळी दाखल होत घटनेचा पंचनामा केला आहे.

म्हापसा येथे पहाटे झालेल्या अपघातात कोलवाळच्या दिशेने चाललेल्या कारला पुलावर असताना अचानक आग लागली. या अपघातात कोणतीही जीवितहानी झाली नसून या घटनेत जवळपास तीन लाखांचे नुकसान झाले आहे तर तीस हजारांपर्यंतचे नुकसान वाचवण्यात यश आले असल्याची माहिती अग्निशमन दलाच्या जवानांनी दिली.