पणजी : पर्वरी येथे कारचा वीजेच्या खांबाला धडकून भीषण अपघात झाला आहे. आरजी हॉस्पिटल समोर रेंट अ कार वीजेच्या खांबाला धडक देत फूटपाथवर उलटल्याची घटना बुधवारी सकाळी घडली. या अपघातात कारमधील जोडप्याला किरकोळ इजा झाल्याची माहिती आहे.

पर्वरी परिसरात कारचा अपघात (Accident) पाहायला मिळाला आहे. एका विजेच्या खांबाला रेंट अ कार धडकून कारमधील दोन पर्यटक जखमी झाले आहेत. या अपघातात कारचंही मोठं नुकसान झालं आहे. राजस्थानमधील हे पर्यटक जोडपं असून त्यांना किरकोळ इजा झाल्याची माहिती आहे. या रेंट अ कारसह आरजी हॉस्पिटल कर्मचाऱ्यांच्या दोन वाहनांचेही नुकसान झालं आहे.

दरम्यान पणजीजवळच (Panjim) असलेल्या वेरे भागात मंगळवारी मालवाहू ट्रकचा थरार पाहायला मिळाला आहे. भरधाव ट्रकचे अचानक ब्रेक निकामी झाल्याने तो एका मंदिरात घुसला. वेरे परिसरातील सरस्वती मंदिराचं या अपघातात मोठं नुकसान झालं आहे. ट्रक मंदिरात (Temple) घुसल्याने वेरे परिसरात एकच गोंधळ उडाला. या अपघातात ट्रकच्या दर्शनी भागाचंही मोठं नुकसान झालं आहे, तर मंदिराच्या एका बाजूचं नुकसान झाल्याचं दिसत आहे. चालकालाही किरकोळ इजा झाल्याची प्राथमिक माहिती मिळाली आहे.