डिचोली : डिचोली परिसरात कारचा अपघात झाला आहे. चालकाचं नियंत्रण सुटल्याने कार रस्त्याशेजारील झाडीत घुसली, मात्र सुदैवाने कारमधील तिघेही प्रवासी थोडक्यात बचावले आहेत. हे प्रवासी तेलंगणामधून गोवा फिरायला आल्याची माहिती आहे. (Car Accident in Bicholim News Updates)

डिचोली-साखळी (Sanquelim) हमरस्त्यावर झालेल्या अपघातात कार थेट रस्त्याशेजारील झाडीत घुसली. सुदैवाने या अपघातात हैद्राबाद येथील तीन युवक सुखरूप बचावले आहेत. त्यातच ज्याठिकाणी हा अपघात (Accident) घडला तिथे विजेचा खांब होता. विजेच्या खांबाला धडक बसली असती, तर मोठा अनर्थ घडण्याची भीती होती.

शुक्रवारी सकाळी हा कार अपघात घडला आहे. चालकाचे कारवरील नियंत्रण गेल्याने हा अपघात घडला. कारमधील प्रवाशांना किरकोळ इजा झाल्याची माहिती आहे. झाडीत कार घुसल्याने कारचंही किरकोळ नुकसान झालं आहे. गोव्यात कोरोनाची तिसरी लाट ओसरल्यानंतर पुन्हा पर्यटकांचा (Tourist) ओघ सुरु झाला आहे. त्यातच अपघातांमध्येही वाढ होताना दिसत आहे.