Cape Corporation : केपे पालिकेच्‍या तिजोरीत खडखडाट असल्‍याने गेले तीन महिने पालिकेच्या कामगार आणि कर्मचाऱ्यांना वेतन मिळाले नव्‍हते. त्‍यामुळे गणेश चतुर्थीचा सण साजरा करताना त्‍यांना अनेक अडचणींना तोंड द्यावे लागले होते.

या कर्मचाऱ्यांची दिवाळी तरी सुखात जाईल का, असा सवाल करत दैनिक ‘गोमन्‍तक’ने यासंबंधी वृत्त प्रसिद्ध केले होते. त्‍याची दखल घेऊन केपे पालिकेने आज तातडीची बैठक घेत हा वेतनाचा प्रश्‍न मार्गी लावला.

नगराध्यक्षा सुचिता शिरवईकर यांनी दिलेल्‍या माहितीनुसार, आज त्‍यांनी इतर नगरसेवकांसोबत बैठक घेऊन वेतनाच्‍या प्रश्‍नावर तोडगा काढला. केपे पालिकेकडे उत्पन्नाचे भक्कम स्रोत नसल्याने कर्मचाऱ्यांचे वेतन देताना काही प्रमाणात अडचणी येतात.

पण पालिकेने वेळोवेळी त्यावर तोडगा काढून कामगारांचे वेतन दिले आहे; पण यावेळी थोडा उशीर झाल्याचे शिरवईकर यांनी मान्य केले.

आर्थिक स्रोेताचा अभाव

2014 पूर्वी ज्यांनी घरे बांधली, अशा बऱ्याच लोकांनी घर क्रमांक घेतला नसल्याने पालिकेचा महसूल बुडाला आहे. त्यामुळे या लोकांनी घर क्रमांक घेण्यासाठी पालिकेशी संपर्क साधावा, असे दयेश नाईक यांनी सांगितले.

केपे बाजार भौगोलिकदृष्ट्या लहान असून येथे कोणतेही उद्योग-व्यवसाय तसेच आर्थिक उलाढाल होत नसल्याने पालिकेला आर्थिक संकटांना तोंड द्यावे लागते. यासाठी राज्य सरकारने या पालिकेकडे विशेष लक्ष दिले पाहिजे, असेही नाईक म्हणाले.

सरकारने वळवले जकात शुल्क

पालिकेला लोकांकडून लाखो रुपये येणे बाकी आहे. तसेच केपे येथे एकमेव पेट्रोल पंप असून त्याद्वारे मिळणारे जकात शुल्कही सरकारने परस्पर वळवल्याने आम्हाला बराच त्रास होत असल्याचे त्यांनी सांगितले.

पालिकेला येणे असलेले पैसे लोकांनी लवकरात लवकर जमा करावे, असे आवाहन माजी नगराध्यक्ष तथा विद्यमान नगरसेवक दयेश नाईक यांनी केले आहे.