Canacona: पाळोळे व अन्य भागांतील स्थानिक फिरत्या गाडेवाल्यांना सरकारी बळाचा वापर करून सतावल्यास रस्त्यावर उतरू, असा इशारा स्वाभिमानी जागृत काणकोणकर आणि जनसेना वॉरियर्स यांच्या शिष्टमंडळाने काणकोणचे पोलिस निरीक्षक चंद्रकांत गावस यांना दिला.

काल या शिष्टमंडळाने पोलिस निरीक्षक गावस यांची भेट घेतली. यात नगरसेवक धीरज नाईक गावकर, शुभम कोमरपंत, माजी नगराध्यक्ष श्‍यामसुंदर नाईक देसाई आणि कॉंग्रेस कार्यकर्त्यांचा समावेश होता.

यावेळी नगरसेवक गावकर म्हणाले, स्थानिक गाडेधारकांना हेतूपुरस्सर सताविण्यात येत आहे. मात्र, यापुढे हे खपवून घेणार नाही. स्थानिक व्यावसायिकांना सत्ताधारी नेत्यांकडून सूड बुद्धीने त्रास दिला जात असल्याचा आरोप काँग्रेस नेते जनार्दन भंडारी यांनी केला आहे. हे प्रकार न थांबवल्यास आंदोलन करण्याचा इशारा त्यांनी दिला आहे.

मुख्याधिकाऱ्यांना घेराव

काणकोणच्या मुख्याधिकाऱ्यांनी पाळोळे येथील स्थानिकांचे रस ऑम्लेट, फास्ट फूड गाडे बंद केले आहेत. त्यामुळे स्थानिकांमध्ये असंतोष पसरला आहे. सोमवारी स्वाभिमानी जागृत काणकोणकर आणि जनसेना वॉरियर्सने मुख्याधिकारी मधु नार्वेकर यांना या विषयावरून घेराव घातला होता

विरोधकांचा सूड बुद्धीने छळ

पाळोळे येथे फिरत्या गाडेधारकावर अन्याय करण्यात येत आहे. हा तरुण शहराच्या विकासाच्या मुद्द्यावर नेहमीच आघाडीवर होता आणि विविध आंदोलनांतही सहभागी होता. दुर्दैवाने तो सत्ताधारी पक्षाचा समर्थक नसल्याने त्याला त्रास देण्यात येत आहे, असा आरोप भंडारी यांनी केला.