Canacona Light Issue

काणकोण: काणकोणात कोटी रुपये खर्चून भूमिगत वीजवाहिन्या घालूनही विजेचा लपंडाव सुरूच आहे. दिवाळीपासून दर पंधरा मिनिटांनी वीज खंडित होते. काहीवेळा उच्च दाबाचा वीजपुरवठा होतो त्यामुळे रेफ्रिजरेटर, टिव्ही यासारखी वीज उपकरणे निकामी झाल्याच्या रहिवाशांच्या तक्रारी आहेत.

भूमिगत वीजवाहिन्या घातल्यामुळे विजेचा लपंडाव कमी होऊन अखंडित वीजपुरवठा होण्याची नागरिकांची अपेक्षा होती. मात्र, त्याचा प्रत्यक्ष फायदा मिळण्याऐवजी खंडित वीजपुरवठ्याच्या समस्येला सामोरे जावे लागत असल्याचे नागरिकांचे म्हणणे आहे.

यासंदर्भात स्थानिक वीज अभियंत्यांना विचारले असता शेल्डे येथे वीजपुरवठा यंत्रणेत बिघाड झाल्यामुळे ही समस्या निर्माण झाली आहे, असे त्यांनी सांगितले. त्याचप्रमाणे सध्या लोलये, पैंगीण, आगोंद, खोला, गावडोंगरी, खोतीगाव या भागात वीज व जलपुरवठा खात्याची बिले भरण्याची कोणतीच सोय नसल्याने वीज व जलपुरवठा ग्राहकांना चावडी येथे येऊन बिल भरणा करावा लागत आहे, त्यावर तोडगा काढण्याची मागणी करण्यात येत आहे.