काणकोण तालुक्यातील काही डायलिसिस रुग्णांनी विरोधी पक्षनेते युरी आलेमाव यांची भेट घेऊन त्यांना भेडसावणाऱ्या समस्या आणि अडचणी त्यांच्यासमोर मांडल्या. त्यांच्याच विनंतीवरून विरोधी पक्षनेते त्यांच्यासोबत काणकोण सामाजिक आरोग्य केंद्रात आरोग्य अधिकारी डॉ. जुझे तावारीस यांना भेटले.

यावेळी विरोधी पक्षनेते युरी आलेमाव यांना तेथे अनेक आरोग्यविषयक सुविधा उपलब्ध नसल्याचा उलगडा झाला.

डायलिसिस युनिटमध्ये रुग्णांना भेडसावणाऱ्या समस्या आणि तक्रारी आलेमाव यांनी ऐकून घेतल्या. डायलिसिसच्या रुग्णांना आवश्यक इंजेक्शन्स घेण्यासाठी दुसऱ्या मजल्यावरून तळमजल्यावर येऊन पुन्हा दुसऱ्या मजल्यावर जावे लागते. यासंबंधी डायलिसिस युनिटमध्येच आवश्यक ते इंजेक्शन्स उपलब्ध करून देण्यात येईल, असे डॉ. तावारीस यांनी सांगितले. यावेळी रुग्णांनी या आरोग्य केंद्रातील इतर समस्याही युरी आलेमाव यांच्यासमोर मांडल्या.

युनिटचे स्थलांतर रखडले

येथील डायलिसिस युनिट हॉस्पिटलच्या बाहेरील कोविड युनिट तळमजल्यावर हलवायचे होते; परंतु वेळोवेळी वीज यंत्रणेत बिघाड झाल्यामुळे ते त्या ठिकाणी नेणे उचित होणार नाही. मात्र, हे डायलिसिस युनिट अन्यत्र हलविण्याची विनंती केली जाऊ शकते, असे डॉ. जुझे तावारीस यांनी सांगितले.

प्लंबरअभावी स्वच्छतागृहे नादुरुस्त

येथील डायलिसिस युनिटमधील स्वच्छतागृहे योग्य अवस्थेत नाहीत. ती तातडीने दुरुस्त करणे आवश्यक असल्याचे निदर्शनास आणून दिले असता आरोग्य अधिकारी म्हणाले की, त्यांनी सार्वजनिक बांधकाम विभागाला प्लंबर पाठवण्यास सांगितले होते; परंतु त्यांना योग्य प्रतिसाद मिळालेला नाही. मात्र, लवकरात लवकर स्वच्छतागृहे दुरुस्त करणार असल्याचे त्यांनी सांगितले.