पणजी: काणकोण तालुक्यातील गावडोंगरी येथे गोवा फॉरवर्डची प्रचारसभा पोलिसांनी बंद पाडण्याचा प्रकार शनिवारी रात्री घडला. पोलिसांच्या या कृत्यावर काँग्रेस आमदार कार्लुस फेरेरा यांनी आक्षेप नोंदवत तोंडसुख घेतले.

काणकोण पोलिस निरीक्षक यांनी आचारसंहिता पाहिली आहे का? त्यातील नियम काय सांगतात, हे पोलिसांना माहीत नाहीत का? असे म्हणत त्यांनी आचारसंहितेतील नियम वाचून दाखवले. यासंदर्भात फेरेरा यांनी व्हिडिओ जारी केला आहे.

प्रचारसभा होणार आहे, त्याची माहिती पोलिस किंवा तत्सम प्रशासकीय यंत्रणेला देणे आवश्यक आहे. तसेच सभेसाठी परवानगी घेणे गरजेचे आहे. त्याशिवाय इनडोअर सभा असल्यास त्यास ध्वनी प्रदूषणाचा नियम तसेच ध्वनीयंत्रणा लावण्याची परवानगी लागत नाही. तरीही पोलिसांनी गोवा फॉरवर्डच्या प्रचार सभेत जाऊन जे कृत्य केले ते निषेधार्ह आहे, असेही त्यांनी नमूद केले.

झालेली कारवाई बेकायदेशीर!

पोलिस निरीक्षक आणि इतर पोलिसांनी ज्या पद्धतीने सभेत जाऊन ती नियमबाहय पद्धतीने बंद पाडली आहे, हे स्पष्ट दिसते. आपण त्या ठिकाणी नव्हतो, पण व्हिडिओ वरून ते स्पष्ट दिसत आहे. पोलिसांची कारवाई पूर्णपणे बेकायदेशीर आहे. गोवा फॉरवर्ड पक्षाने त्या पोलिस निरीक्षकाविरोधात कायदेशीर कारवाई करावी, असे आपण सूचवू इच्छितो. पोलिसांनी कायद्याच्या चौकटीत राहून काम करावे, असे आपण त्यांना आवाहन करतो, असे फेरेरा यांनी नमूद केले आहे.