काणकोण: सीझेडएमपीच्या विरोधात काणकोणाच्या मच्छिमारानी आज (ता.4) शुक्रवारी मासळी मार्केट बंद ठेवून आंदोलन छेडले.या आराखड्यामुळे स्थानिक मच्छिमारांच्या पारंपारिक मासेमारी व्यवसायाबरोबरच त्यांच्या निवासावर गदा येणार आहे. त्यांना किनारी भागातून विस्थापित व्हावे लागेल, अशी भीती आहे. या आराखड्याचा निषेध म्हणून आज (शुक्रवारी)सकाळी 7 ते दुपारी 1 वाजेपर्यंत अर्धा दिवस मासे मार्केट बंद ठेवण्यात आले.

काणकोण मधील कोणीही मच्छिमार मासेमारीसाठी शुक्रवारी समुद्रात उतरले नाहीत, अशी माहिती क्षत्रिय पागी समाजचे अध्यक्ष अशोक धुरी यांनी दिली.आज पालिका मासळी मार्केट बंद राहिल्याने चावडी बाजारात शुकशुकाट होता. पैंगीण,श्रीस्थळ, लोलये भागातही विक्रेते आले नाहीत.

माजाळी,कारवारच्या मासे विक्रेत्यांचाही पाठिंबा

चावडी वगळता अन्य भागात माजाळी,कारवार येथून मासळी विक्रेत्या महिला मासे विक्रीसाठी येत असतात, मात्र त्यांनीही या बंदला पाठिंबा देऊन मासे विक्री केली नाही. संध्याकाळी काही प्रमाणात पालिका मासळी मार्केटात मासे विक्री करण्यात आली मात्र स्थानिक मच्छिमार आज समुद्रात मासेमारीसाठी न गेल्याने स्थानिक ताज्या मासळीचा अभाव,मासळी मार्केटात संध्याकाळी दिसत होता.