कळंगुट: नाईकावाडा-कळंगुट येथे बॅनसन अपार्टमेंटमध्ये करासवाडा-म्हापसा येथील दिओदिता फर्नांडिस यांचा शुक्रवारी गळा आवळून खून करण्यात आला होता. मालमत्ता खरेदी-विक्रीतील कमिशनच्या वादातून त्यांचा खून झाल्याचे पोलिस तपासात स्पष्ट झाले असून याप्रकरणी पोलिसांनी दोघा दलालांना अटक केली.
कळंगुट पोलिसांनी या प्रकरणाचा मागोवा घेत रविवारी आकीब अमन शौकत अल्बे (मूळ रत्नागिरी) तसेच निखिल चंद्रकांत राजे (मूळ पुणे) सध्या राहणारा म्हापसा या संशयितांना ताब्यात घेतले.
दिओदिता फर्नांडिस यांचा खून खरेदी-विक्री व्यवहारातील कमिशनवरून झाल्याचे स्पष्ट झाले आहे. कळंगुट पोलिस गेले दोन दिवस संशयितांच्या मागावर होते. शेवटी हणजूण येथील पेट्रोल पंप परिसरात कळंगुट पोलिसांनी शिस्तबद्ध सापळा रचून दोघांनाही ताब्यात घेतले. पोलिसांनी संशयितांना न्यायालयात हजर केले असता, त्यांना दहा दिवसांची पोलिस कोठडी बजावली आहे.
दिओदितासोबत केलेल्या अनेक मालमत्ता व्यवहारांतील कमिशनचे पैसे देण्यास त्या टाळाटाळ करत होत्या. त्यामुळे संशयित आकीब आणि निखिल त्यांच्या मागावर होते. शुक्रवारी त्या एकट्याच कळंगुट येथे फ्लॅटवर आल्याची संधी साधून त्यांचा गळा आवळून खून केला. तसेच संशयितांनी त्यांच्या बँक खात्यातील रक्कम आपल्या खात्यावर धनादेशाद्वारे जमा करून घेतले.
दिओदिता यांना कळंगुटमधील बॅनसन अपार्टमेंटमधील आपला फ्लॅट दुरुस्तीनंतर विक्रीस काढायचा होता. त्यामुळे त्यांचे तेथे येणे-जाणे होते. याआधीच्या अनेक प्रॉपर्टी व्यवहारात दिओदिता फर्नांडिस तसेच संशयितांचा एकमेकांशी संपर्क आला होता. पैशांच्या देवाणघेवाणीतून त्यांच्यात अनेकदा खटके उडत असत, अशी माहिती कळंगुट पोलिसांनी दिली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.