सडा मुरगाव येथील एल्टन फर्नांडिस यांच्या घरातील 20 हजार रुपयांची सामग्री चोरी केल्याप्रकरणी मुरगाव पोलिसांनी 19 वर्षीय विनायक राणे या संशयिताला अटक केली आहे. घराच्या बाल्कनीचा दरवाजा फोडून संशयिताने घरातील विविध साहित्याची चोरी केल्याची तक्रार रविवारी दुपारी एल्टन यांनी पोलीस स्थानकावर नोंद केली. त्यानंतर मुरगाव पोलिसांनी कारवाई करून संशयिताला ताब्यात घेऊन त्यानंतर त्याला अटक केली.

पोलिसांनी दिलेल्या माहितीनुसार 25 जानेवारी सकाळी 10 ते 30 जानेवारी सकाळी 8.30 च्या दरम्यान चोरीचा प्रकार घडला. सडा एमपीटी कॉलनी वसाहतीत राहणाऱ्या एल्टन यांनी रविवारी दुपारी 1.30 च्या सुमारास मुरगाव (Mormugao) पोलीस स्थानकावर त्याच्या घरात चोरी झाल्याची तक्रार नोंदवली होती.

एल्टन याच्या घरातून चोरट्यांने एलईडी टीव्ही, टॉर्च, 10 ग्रॅम चांदीचे एक नाणे आणि इत्यादी मिळून 20 हजार रुपयांची सामग्री चोरल्याची माहिती तक्रारीत नमूद केली आहे. चोरीची माहिती मिळताच मुरगाव पोलिसांनी तपासाची चक्रे वेगात फिरवली व संशयितालाताब्यात घेतले. मुरगाव पोलीस (police) स्थानकाचे उपनिरीक्षक आदित्य नाईक गावकर यांच्या मार्गदर्शनाखाली या चोरी प्रकरणाचा अधिक तपास चालू आहे.