बोरी: बोरी सर्कल येथे आज पहाटे 4 च्या सुमारास कँटरने ट्रकला जोरदार धडक दिल्याने कँटरच्या दर्शनी भागाचे लाखो रुपयांचे नुकसान झाले आहे. कँटर चालकाला जबर मार लागल्याने त्याला उपचारासाठी गोमेकॉ इस्पितळात दाखल करण्यात आले. आज शुक्रवारी बोरी फुलावरून वास्को येथून बेळगावच्या दिशेने जाणारा एमएच 12 जी 0605 या क्रमांकाचा मालवाहू ट्रक बोरी पुलाच्या जोडरस्त्यावरून सर्कलकडे येत असताना मागून येणाऱ्या (एमएच 04एफ यू 3305) या कँटरने जोरदार धडक दिली.

या धडकेत कँटरचा दर्शनी भागाचा चुराडा झाला. कँटरचे केबीन पूर्णपणे उध्वस्त झाले. कँटर चालक यात गंभीर जखमी झाला. रक्तबंबाळ स्थितीत त्याला फोंडा पोलिसांनी प्रथम फोंड्याच्या आयडी इस्पितळात व नंतर बांबोळीत उपचारार्थ नेले. हा अपघात एवढा जबरदस्त होता, की आवाजाने लोक जागे होऊन अपघातस्थळी आले. फोंडा पोलिसांनी पंचनामा करून कँटर क्रेनच्या मदतीने हटवून रस्ता मोकळा केला.