पणजी : पर्वरीत साई सर्व्हिस शोरुममध्ये बॉम्ब ठेवल्याचा (Bomb Threat) निनानी फोन आल्याने एकच खळबळ उडाली. गुरुवारी दुपारी शोरुममध्ये एक निनावी फोन आल्या ज्यात समोरील व्यक्तीने शोरुममध्ये बॉम्ब ठेवल्याचं सांगितलं. शोरुमच्या मॅनेजरने याची माहिती लगेच पोलिसांना दिली आणि पोलिसांनी घटनास्थळी धाव घेतली.

पोलिसांना माहिती मिळताच बॉम्बशोधक पथकासह दहशतवादविरोध पथक, अग्निशमन दल यासह पोलीस पथकंही घटनास्थळी दाखल झाली. मात्र संपूर्ण शोरुमसह परिसराच्या तपासणीनंतर हा निनावी कॉल (Call) अफवा असल्याचं समोर आलं.

दुपारी 12 वाजण्याच्या सुमारास साई सर्व्हिस शोरुममधून आम्हाला फोन आला. आम्ही तातडीने घटनास्थळी दाखल झालो. सर्व कर्मचाऱ्यांना बाहेर काढून आम्ही शोरुमची तपासणी केली. मात्र बॉम्ब (Bomb) ठेवल्याची ही अफवा असल्याचं तपासाअंती समोर आल्याचं पोलीस उपअधीक्षक अॅडविन कुलासो यांनी स्पष्ट केलं. दरम्यान पोलिसांनी (Police) निनावी फोन करणाऱ्या संशयिताला ताब्यात घेतलं आहे.