वास्को: बोगदावासियांच्या सुरक्षिततेचा प्रश्न असल्याने तसेच त्यांना इतर समस्यांना सामोरे जावे लागणार असल्याने बोगदा येथे होणारी फॉर्म्युला -४ रेस आम्हाला नकोच असा सूर बोगदा येथे गुरुवारी (ता.९) सायंकाळी उशीरा घेण्यात आलेल्या जाहीर सभेत उमटला.

या सभेला खास उपस्थिती लावलेले माजी मंत्री मिलिंद नाईक यांनी लोकांना सदर स्पर्धा नको असल्यास, आम्हालाही नको असे स्पष्ट केले. बोगदा येथे ३१ ऑक्टोबर, १ व २ नोव्हेंबरला फॉर्म्युला -४ रेसचे आयोजन करण्यात आले आहे.

या रेसमुळे मुरगाव जगाच्या नकाशावर येईल. येथे काही पायाभूत सुविधा उपलब्ध होतील असे आयोजकांतर्फे सांगितले गेले आहे. सदर रेस व्हावी यासाठी तेथील काम युध्दपातळीवर सुरू आहे. तथापी, या रेसला होणारा विरोध आता हळूहळू वाढत चालला आहे.

या रेसमुळे काही समस्या निर्माण होण्याची भीती आहे. त्यामुळे ही रेस दुसरीकडे न्यावी अशी मागणी करण्यात येत आहे.