Goa Accidental Death: गुळे-काणकोण येथील एका विहिरीत मृत कासव काढण्यासाठी गेलेल्या दोन कामगारांचा बुडून मृत्यू होण्याची घटना काल शुक्रवारी सायंकाळी सातच्या सुमारास घडला. त्‍यामुळे एकच खळबळ माजली. संतप्‍त ग्रामस्‍थांनी पेट्रोलपंप कार्यालयाची तोडफोड केली.

मिळालेल्‍या माहितीनुसार, नमी गावकर (गुळे-काणकोण) आणि बारकेलो गावकर (गोकुल्डे-बार्शे) अशी मृत कामगारांची नावे आहेत. आज त्यांचे मृतदेह वैद्यकीय तपासणीनंतर नातेवाईकांच्या ताब्यात देण्‍यात

आले. एक कामगार पहिल्यांदा मृत कासव‌ काढण्यासाठी विहिरीत उतरला. मात्र पाण्यात गटांगळ्या खाऊ लागल्यानंतर दुसरा कामगार उतरला. दोघांचाही बुडून व गुदमरून मृत्यू झाल्‍याचे वैद्यकीय तपासणीत सिद्ध झाले आहे.

दरम्‍यान, ही घटना घडल्यानंतर पेट्रोलपंपवर संतप्‍त जमावाने धाव घेतली. त्यांना आवरताना पोलिसांच्या नाकीनऊ आले. जमावाने पेट्रोलपंप कार्यालयाची तोडफोड केली व मालक तसेच व्यवस्थापकाला घटनास्थळी आणण्‍याची मागणी लावून धरली.

जमावाचा पवित्रा पाहून पोलिसांनी काही नागरिकांना पोलिस स्टेशनवर बोलावून रात्री उशिरा पेट्रोलपंप मालक व‌ व्यवस्थापकाला पाचारण केले. त्यावेळी पेट्रोलपंपच्‍या मालकाने मृत कामगारांच्या कुटुंबीयांना आर्थिक मदत देण्याचे कबूल केले.