Black Panther In Goa: धारबांदोडा पंचायत क्षेत्रातील वंडाळ्या या गावातील अतुल नाईक यांच्या घरी दुसऱ्यांदा शनिवारी पहाटे ब्लॅक पॅंथर सीसीटीव्ही कॅमेरात कैद झाल्यामुळे परिसरात भीतीचे वातावरण आहे. जेव्हा ब्लॅक पॅंथर दुसऱ्यांदा घरातील वऱ्हाड्यात आला.

यापूर्वी ब्लॅक पॅंथरने अनेक भटक्या कुत्र्यांवर हल्ला करून कुत्री फस्त केल्याने त्यांची संख्याही कमी झाली आहे. त्यामुळे घरातील पाळीव कुत्री, मांजरांवर हल्ला होण्याची शक्यता आहे, अशी भीती अतुल यांनी व्यक्त केली.

अनेक कुत्रे व पाळीव मांजरे ब्लॅक पँथरने फस्त केली. या भागात ब्लॅक पॅंथरचा संचार वाढला आहे. 4 नोव्हेंबर रोजी पहिल्यांदा ब्लॅक पॅंथर आमच्या कॅमेऱ्यात कैद झाला होता. आत्ता सहा दिवसांनी पुन्हा हा ब्लॅक पॅंथर आमच्या घराजवळ आला.

या संदर्भात धारबांदोडा येथील वन खात्यात गुरुवारी 9 नोव्हेंबर रोजी माहिती दिल्यानंतर कर्मचाऱ्यांनी आमच्या घरा भोवती पहारा ठेवला. ज्या दिवशी दुसऱ्यांदा हा पॅंथर आला, तेव्हासुद्धा 3 वा. पर्यंत वन खात्याचा पहारा होता.

वन खात्याचे कर्मचारी गेल्यानंतर पहाटे 4-15 वाजता हा पॅंथर कॅमेऱ्यात कैद झाला, अशी माहिती अतूल यांनी दिली. गेल्या तीन ते चार महिन्यात ब्लॅक पँथरने गावातील पाळीव कुत्री व मांजरांची शिकार केली. या भागात सध्या भीतीचे वातावरण असून त्यांनी ब्लॅक पॅंथरचा बंदोबस्त करावा, अशी मागणी या परिसरातील ग्रामस्थांनी केली आहे.

पूर्वी गावात कुठेही बिबटा किंवा ब्लॅक पॅंथर दिसल्यानंतर वन खात्यात तक्रार दिल्यास तात्काळ त्या ठिकाणी पिंजरा लावून हैदोस घालणाऱ्या या रानटी जनावराला पकडत होते. पण गेल्या काही वर्षापासून पिंजरा लावायचा असल्यास वनखात्याकडे अर्ज द्यावा लागतो.

शिवाय या प्रक्रियेत बराच वेळ वाया जातो, त्यामुळे ग्रामस्थांच्या जिवावर बेतू शकते, तेव्हा वनमंत्री विश्वजीत राणे यांनी याकडे गांभीर्याने लक्ष द्यावे, व वन खात्याच्या या धोरणात बदल करावा, अशी ग्रामस्थांची मागणी आहे.

कर्मचारी तैनात

कुळे वन विभाग आरएफओ रवी शिरोडकर यांच्या मार्गदर्शन खाली आज १३ नोव्हेंबर रोजी सायंकाळी वन कर्मचारी यांनी या ठिकाणी आपले सीसीटीव्ही यंत्रणा सुरू केली आहे. या कॅमेऱ्यातून ब्लॅक पॅथर आल्यास त्याच्या सर्व हालचालीचे फोटो क्लिक होणार आहेत. अतुल नाईक यांच्या घराच्या परिसरात वन खात्याने कडक पहारा ठेवलेला आहे.