Damu Naik About 2027 Election

सासष्टी: भारतीय जनता पक्षाच्या प्रदेशाध्यक्षपदाची सूत्रे हाती घेतलेले भाजप प्रदेशाध्यक्ष दामोदर (दामू) नाईक यांनी आज फातोर्ड्यात श्री दामोदर लिंग व नंतर मडगावात पिंपळकट्ट्यावर जाऊन श्री दामबाबाचे आशीर्वाद घेतले. ते म्हणाले, की २०२७ मध्ये २७ जागा जिंकणे हे आपले ध्येय असून त्यासाठी संपूर्ण गोव्यात कार्यकर्त्यांची फळी आणखी मजबूत केली जाईल.

निवडणुका व संघटनात्मक बांधणी हे मोठे आव्हान आपल्यासमोर आहे. पक्ष वाढत आहे. त्यामुळे जे नवीन कार्यकर्ते पक्षात सामील होतात त्यांना सामावून घेण्याची गरज आहे.

आगामी निवडणुकीत मतदार चेहरा, त्याची निष्ठा व शब्दाला जागणारा आहे की नाही याची चाचपणी केली जाणार आहे. फातोर्डा व मडगाव यामध्ये आपण भेदभाव केलेला नाही. मडगावकरांनी सदैव आपल्याप्रति प्रेम दाखवले. आपला पराभव झाला असेल, पण कधी मते कमी झाली नाहीत. आपण मडगावकरांचा सदैव ऋणी आहे, असेही त्यांनी सांगितले. फातोर्डा व मडगावमध्ये आज भाजपच्या जुन्या व नव्या कार्यकर्त्यांतर्फे त्यांचे भव्य स्वागत करण्यात आले.