Digambar Kamat : मडगाव नगरपालिकेच्या नगराध्यक्षपदासाठीचा उमेदवार पक्षश्रेष्ठी ठरवतील, असे मडगावचे आमदार दिगंबर कामत यांनी सांगितले. मी आता भाजपचा एक भाग आहे. निर्णय घेण्यासाठी मी आता एकटाच नाही, असेही कामत मडगावात घेतलेल्या पत्रकार परिषदेत म्हणाले.

मंत्रिपदासंदर्भात कामत म्हणाले, की याविषयी आपल्याला काहीच माहीत नाही. केवळ वर्तमानपत्रातून मी मुख्यमंत्री होणार, दुसऱ्या दिवशी उपमुख्यमंत्री व तिसऱ्या दिवशी मंत्री होणार असे वाचतो. नगरपालिकेसाठी खास कायदा आहे व त्या कायद्यानुसार नगरपालिकेचा कारभार चालू असतो. या कायद्यानुसार नगराध्यक्षाची निवड होईल. सोनसोडो कचरा प्रश्न सोडविण्यासाठी आपण प्राधान्य देत आहे. त्यासंबंधी प्रक्रिया सुरू झाली असून नगर विकास सचिवांकडे आपली बोलणी चालू आहेत.

व्होकल फॉर लोकल प्रदर्शन रविवारी

सेवा पंधरवडाअंतर्गत 2 ऑक्टोबर रोजी सकाळी 9 ते संध्याकाळी 7 पर्यंत दैवज्ञ भवनात व्होकल फॉर लोकल प्रदर्शन आयोजित करण्यात आले असून त्यात स्थानिक महिला मंडळे, एनजीओ, स्वयंसेवी संस्थांतर्फे जे पदार्थ तयार केले जातात त्याचे प्रदर्शन भरविले जाणार आहे. शिवाय खास मुलांनी बनविलेल्या वस्तूही प्रदर्शनात विक्रीस ठेवल्या जातील. या प्रदर्शनात 25 ते 30 स्टॉल्स असतील.

मडगाव भाजप घेणार क्षयरोग रुग्णांना दत्तक

देशातील क्षयरोगाच्या संपूर्ण निर्मूलनासाठी सरकार प्रयत्नशील आहे. गोव्यातही भारतीय जनता पक्षातर्फे क्षयरोग रुग्णांना दत्तक घेण्याचे काम सुरू आहे. मडगावातील 11 क्षयरोग रुग्णांनाही दत्तक घेतले जाईल, असे आमदार दिगंबर कामत यांनी जाहीर केले. रविवारी नागरी आरोग्य केंद्रांमध्ये अकराही क्षयरोग रुग्णांना औषधे व गरजेच्या वस्तू पुरविल्या जातील, असे ते म्हणाले.