कुंकळ्ळी: जलस्त्रोत मंत्री व काँग्रेसचा त्याग करून भाजपात गेलेले वेळळी मतदारसंघाचे आमदार फिलिप नेरी रॉड्रिग्स यांनी अखेर राष्ट्रवादी काँग्रेस पक्षाच्या उमेदवारीवर निवडणूक लढविण्याचा निर्णय घेतला आहे. रविवारी फिलिप नेरी यांनी आपल्या कार्यकर्त्यांची बैठक घेऊन आपल्या राजकीय भविष्याबाबत चर्चा केली. (Philip Neri Rodrigues News Updates)

आपण वेळळी मतदारसंघातुन निवडणूक लढवावी का? निवडणूक (Election) लढायची झाल्यास अपक्ष म्हणून लढावे की राष्ट्रवादी काँग्रेस पक्षाच्या उमेदवारीवर लढावे यावर फिलिप यांनी कार्यकर्त्यांचे मत जाणून घेतले. कार्यकर्त्यांनी फिलिप यांना राष्ट्रवादीच्या उमेदवारीवर निवडणूक लढण्यास आग्रह केला. कार्यक्रर्याच्या निर्णयाला मान देऊन फिलिप सोमवारी आपल्या मंत्रीपदाचा राजीनामा देणार असून ते आमदारकीचा व भाजपच्या सदस्यपदाचा ही त्याग करणार आहेर. मंगळवारी फिलिप राष्ट्रवादी काँग्रेस पक्षात (NCP) प्रवेश करणार असून शुक्रवारी ते आपला उमेदवारी अर्ज भरणार असल्याचे कार्यकर्त्यांनी पत्रकारांशी बोलताना सांगितले.

फिलिप नेरी रॉड्रिग्स काँग्रेस (Congress) पक्षाच्या उमेदवारीवर 2017 च्या निवडणुकीत निवडून आले होते. दोन वर्षा पूर्वी फिलिप नेरी यांनी इतर नऊ काँग्रेसी आमदारासह काँग्रेस पक्षाचा त्याग करून भाजपात प्रवेश केला होता व त्यांना मंत्रीपद ही बहाल करण्यात आले होते.निवडणूक जवळ आल्यावर फिलिप यांनी पुन्हा काँग्रेस पक्षात जाण्याचा प्रयत्न केला होता.कांग्रेसने जवळ न केल्यावर फिलिप ने तृणमूलची वाट धरण्याचा प्रयत्न केला होता मात्र फिलिप यांच्या पूर्वीच वेळळीचे माजी आमदार बेंजामिन सिल्वा यांनी तृणमूल मध्ये उडी घेतल्यामुळे फिलिप ची संधी हुकली होती फिलिप यांनी अपक्ष म्हणून निवडणुकीत उतरण्याचा पर्याय खुला ठेवला होता मात्र शेवटी त्यांनी राष्ट्रवादीचे घड्याळ स्विकारले.