म्हापसा: मांद्रे मतदारसंघातून उमेरवारीची अपेक्षा असणारे माजी मुख्यमंत्री लक्ष्मीकांत पार्सेकर यांच्याऐवजी पक्षाने दयानंद सोपटे यांना उमेदवारी जाहीर केल्याने पार्सेकर नाराज झाले. त्यांनी पक्षाला राजीनामा देऊन आता मांद्रेतून अपक्ष निवडणूक (Election) लढवण्याचा निर्णय घेतला आहे. त्यांचा हा निर्णय भाजपला पचवणे कठीण जात आहे. याबाबत बोलताना मुख्यमंत्री प्रमोद सावंत म्हणाले, माजी मुख्यमंत्री लक्ष्मीकांत पार्सेकर यांना परत पक्षात आणण्यासाठी भाजप नेते प्रयत्नशील आहेत.

भाजपचे (BJP) मंद्रेतील उमेदवार दयानंद सोपटे यांच्या उमेदवारी अर्जावेळी पत्रकारांशी बोलताना सावंत म्हणाले, “भाजप हा राष्ट्रीय पक्ष आहे आणि पार्सेकर हे आमचे गोव्यातील सर्वोच्च नेते आहेत. ते माजी मुख्यमंत्री आणि भाजपचे माजी अध्यक्ष आहेत. पार्सेकर यांच्याशी आमची चर्चा सुरू असून, त्यांना परत भाजपमध्ये आणण्यात आम्ही यशस्वी होऊ अशी मला खात्री आहे.

सोपटे यांनी मुख्यमंत्र्यांच्या उपस्थितीत निवडणूक अधिकाऱ्यांसमोर उमेदवारी अर्ज दाखल केला. विधानसभा निवडणुकीत भाजपची सत्ता कायम राहील, असा विश्वास व्यक्त करून प्रमोद सावंत (Pramod Sawant) म्हणाले, "मांद्रेला मंत्रिपदाची गरज आहे. मांद्रेतील लोक केवळ आमदारच नव्हे तर मंत्रीही निवडतील. लोकांना विश्वास आहे की गोव्याला केवळ भाजपच स्थिर सरकार देऊ शकतो."