राज्यात सध्या दूधसागर पर्यटन हंगामाच्या वादावरुन भाजपमध्येच जुंपली आहे. सावर्डे मतदारसंघातील भाजपमधील दोन नेते एकमेकांसमोर उभे ठाकले आहेत. दूधसागर असोसिएशनचा वाद मिटवण्यात स्थानिक आमदार आणि जीटीडीसीचे अध्यक्ष डॉ. गणेश गावकर अपयशी ठरल्याचा घणाघात सावर्डे भाजप मंडळाचे अध्यक्ष विलास देसाई यांनी केला.

एवढ्यवरच न थांबता या वादामध्ये मुख्यमंत्री डॉ. प्रमोद सावंत यांची काहीही चूक नसल्याचे देसाई म्हणाले. देसाई यांनी गावंकर यांच्यावर जाहीरपणे टीकास्त्र डागलं. त्यामुळे दूधसागऱ पर्यटनाच्या हंगामाच्या वादावरुन भाजपमधील दोन नेते आमनेसामने आले आहेत. राज्यात गेल्या काही दिवसांपासून दूधसागर पर्यटन हंगामाचा वाद चांगलाच पेटला आहे.

मुख्यमंत्र्यांकडून तोडगा

दरम्यान, मुख्यमंत्री डॉ. प्रमोद सावंत यांच्याकडून दोन दिवसांपूर्वी जीटीडीसी आणि टूर ऑपरेटर्स यांच्यातील समस्यांचे निवारण करण्यात आल्याचे आमदार देविया राणे यांनी सांगितले. याशिवाय, वन विभागाकडून दूधसागर पर्यटन हंगाम सुरु करण्यास परवानगी दिल्याचे देखील त्यांनी यावेळी नमूद केले.

जीटीडीसीचा हस्तक्षेप नको

दूधसागर धबधबा (Dudhsagar Waterfall) पर्यटन व्यवसायाची वेबसाईट आहे, ती आमची वेबसाईट आम्हांला परत द्यावी. या ठिकाणी जीटीडीसीचा हस्तक्षेप नको. सरकारला जो काही कर आहे, तो आम्ही भरण्यास तयार आहे, असे जीप टूर ऑपरेटर्सनी सांगितले. आम्हांला जीटीडीसीचा हस्तक्षेप नको, आम्हांला आपण सहकार्य करावे, अशी मागणी अध्यक्ष नीलेश वेळीप आणि असोसिएशनच्या पदाधिकाऱ्यांनी केली.