कळंगुट: मी कॉंग्रेससोबत आज विरोधी बाकावर जरी असलो तरी भाजप सरकार कुणाचीच विकासात्मक कामे अडवून ठेवणार नाही. याआधीसुद्धा भाजपकडून तसा प्रकार झालेला नाही. त्यामुळे कॉंग्रेसचे आमदार आपल्या मतदारसंघाच्या विकासकामाबाबत निश्चिंत असल्याचे मत कळंगुटचे आमदार तथा विरोधी पक्षनेते मायकल लोबो यांनी हडफडेंत सांगितले.

हडफडे पंचायत क्षेत्रातील फेट फिश परिसर (नवीन पूल) ते कळंगुट येथील जांभळेश्वर देवस्थानापर्यंतच्या रस्त्याच्या हॉटमिक्सिंग कामास नारळ वाढवून प्रारंभ केल्यानंतर प्रसार माध्यमांशी लोबो बोलत होते. यावेळी त्यांच्यासोबत हडफडेचे पंचसदस्य रोशन रेडकर, कळंगुटचे सरपंच शॉन मार्टिन्स, उपसरपंच शेरॉल लोबो, पंचसदस्य दिनेश सीमेपुरुषकर, सालुझिनो फर्नांडिस आदी मान्यवर उपस्थित होते.

‘टुगेदर फॉर कळंगुट’ लढवणार निवडणूक

राज्यात होऊ घातलेल्या निवडणुकांच्या पार्श्वभूमीवर कळंगुट मतदारसंघातील चारही पंचायतींच्या निवडणुका पक्ष पातळीवर नव्हे, तर ‘टुगेदर फॉर कळंगुट’ या बॅनरखाली लढविण्यात येणार असल्याचे लोबो यांनी सांगितले. पंचायत निवडणुकीत ‘टुगेदर फॉर कळंगुट’च्याच उमेदवारांचा विजय निश्चित असल्याचे सांगतानाच यावेळी सक्रिय जुन्या उमेदवारांबरोबरच नवीन उमेदवारांचाही निवडणुकीत सहभाग राहणार असल्याचे स्पष्ट संकेत लोबो यांनी दिले.