पणजी : कळंगुटचे भाजप आमदार आणि विद्यमान मंत्री असलेले मायकल लोबो यांनी मंत्रिपदासह आमदारकीचाही राजीनामा दिला आहे. लोबोंच्या राजीनाम्याचं मात्र भाजपच्या वरिष्ठ नेत्यांकडून स्वागतच झालं आहे. लोबोंच्या जाण्याची वाटच पाहात होतो, अशा शब्दात गोवा भाजप प्रदेशाध्यक्ष सदानंद शेट तानावडे यांनी टोला लगावला आहे. (Michael Lobo Resignation News Update)

मायकल लोबो (Michael Lobo) पक्ष सोडून जाणार हे आम्हाला आधीच माहित होते. त्यामुळे आम्हाला किंवा पक्षाला कोणताही धक्का बसलेला नाही. लोबोंनी भाजप सोडली ते चांगलंच झालं. आम्ही लोबोंनी पक्ष सोडण्याची वाटच पाहात होतो, अशा शब्दात सदानंद शेट तानावडे (Sadanand Shet Tanavade) यांनी निशाणा साधला आहे.

मायकल लोबो म्हापसा आणि शिवोली भागात प्रमाणाबाहेर हस्तक्षेप करत होते. त्यामुळे त्यांच्या जाण्यामुळे आम्हाला कोणताही धक्का बसणार नाही. इतकंच नाही तर शिवोली आणि कळंगुटच्या दोन्ही जागांवर भाजपच (BJP) विजयी होईल असा विश्वासही सदानंद शेट तानावडे यांनी व्यक्त केला आहे. मायकल लोबोंची नाराजी दूर करण्याऐवजी पक्षश्रेष्ठींनी त्यांच्यावरच सडकून टीका केल्याचं चित्र आहे.