सावईवेरे: वेरे - वाघुर्मे ग्रामपंचायत क्षेत्रातील घाणो, सावई, शिलवाडा या भागात गव्याचा मुक्त संचार बराच वाढला आहे. आज घाणो भागातील कुळागरात एक गवा चक्क फेरफटका मारताना लोकांच्या दृष्टीस पडला.

सदर व्हिडिओ सोशल मीडियावर व्हायरल झाला आहे. या भागात गव्यांचा मुक्त संचार असल्याने नागरिकांत भीतीचे वातावरण पसरले आहे. या भागातील बागायतदारांनी काबाडकष्ट करून लागवड केलेल्या पिकांची वारंवार गव्यांकडून नासधूस केली जाते.

त्यामुळे बागायतदारांना नुकसान सोसावे लागत आहे. सावईवेरे हा गाव कुळागरी व बागायतींनी नटलेला असल्याने कुळागरी पीक हेच काही लोकांचे उदरनिर्वाहाचे साधन आहे.

शिलवाडा येथील बागायतदार अभिजीत शिलकर यांनी सांगितले की, शिलवाडा हा प्रामुख्याने डोंगराळ भाग असल्याने अननस उत्पादनात अग्रेसर व एकूणच कुळागरी भाग. मागील काही काळ पाहता वानरांचा वावर असे. परंतु कालांतराने रानटी जनावरे डोंगराळ भागातून कुळागरात व अननसाच्या बागेत प्रवेश करू लागल्याने त्यात पिकाची नासधूस होते.