Agonda Beach: आगोंद समुद्र किनाऱ्याचे सौंदर्य अबाधित राहण्यासाठी समुद्रकाठच्या जमिनीचे संरक्षण गरजेचे आहे. या अनुषंगाने केंद्रीय जैवविविधता समितीच्या आदेशानुसार आज समितीच्या तांत्रिक विभागाचे अभियंता चिन्मय मोरजकर यांनी आगोंद समुद्र किनाऱ्याला भेट देऊन पाहणी केली.

यावेळी सरपंच फातिमा रॉड्रिग्स, उपसरपंच प्रितल फर्नांडिस, सचिव अमोल नाईक गावकर, स्थानिक जैवविविधता व्यवस्थापन समितीचे अध्यक्ष शाबा नाईक गावकर, सदस्य नारायण देसाई, सूरज नाईक गावकर, प्रकाश फळदेसाई, विनोद फळदेसाई, आदी उपस्थित होते.

आगोंद समुद्र किनाऱ्यावरील जमिनीची धूप होत असून या ठिकाणी असलेली माडाची झाडे दर पावसाळ्यात कोसळत असतात. ही बाब केंद्रीय जैवविविधता व्यवस्थापन समितीला या अगोदर आगोंद जैवविविधता व्यवस्थापन समितीने पटवून दिली होती. या पार्श्वभूमीवर केंद्रीय समितीचे सचिव प्रदीप सरमोकादम आणि इतरांनी २७ एप्रिल रोजी पाहणी केली होती.

पावसाळ्यापूर्वी होणार काम

हा समुद्र किनारा १२० बाय १० मीटर ज्यूट टेक्नॉलॉजीचा वापर करून किंवा पाषाणी दगड वापरून या पावसाळ्यापूर्वी सुरक्षित करण्यात येणार असल्याचे मोरजकर यांनी सांगितले. याच ठिकाणी एक ओहोळ असून ते ठिकाण गलिच्छ झाले आहे. त्या ओहोळातील गाळ उपसून ओहोळाच्या काठी असलेले दगड नव्याने बांधून, तसेच झुडपे काढून साफसफाई करण्यात येणार आहे. हे सर्व काम पावसाळ्यापूर्वीच करण्याचा मनोदय अध्यक्ष शाबा नाईक गावकर यांनी व्यक्त केला.