केपे : गुडी पारोडा येथील हमरस्त्यावर आज मंगळवारी 24 मे रोजी सकाळी झालेल्या दोन दुचाकीमध्ये समोरासमोर जोरदार धडक बसल्याने अपघात झाला. या अपघातात अवेडे, केपे येथील प्रकाश नाईक (20) यांचा जागीच मृत्यू झाला तर कावरे येथील देविदास गावकर (32) हा गंभीर जखमी झाले असून त्याला मडगाव येथील जिल्हा हॉस्पिटलमध्ये दाखल करण्यात आले आहे.

केपे पोलिसांनी दिलेल्या माहितीनुसार आज सकाळी 7.45 वा. प्रकाश नाईक हा गुडीहून आपल्या घरी निघाला होता तर देविदास गावकर मडगावला जात होता. गुडी पारोडा येथे पेट्रोल पंप जवळ केपे ते मडगावला जाणाऱ्या मुख्य रस्त्यावर दोघांची समोरासमोर जबरदस्त धडक बसल्याने प्रकाश जागीच ठार झाला. अपघातात देविदास गावकर हा गंभीर जखमी झाल्याने त्याला उपचारासाठी मडगाव येथे जिल्हा हॉस्पिटलमध्ये दाखल करण्यात आल्याचे पोलिसांनी सांगितले.

प्राप्त माहितीनुसार प्रकाश नाईक हा त्यांच्या कुटुंबातील एकुलता एक मुलगा असल्याचे बोलले जाते. केपे पोलिसांनी घटनेचा पंचनामा केला असून नाईक याचा मृतदेह उत्तरीय तपासणीसाठी पाठवण्यात आला आहे. या हमरस्त्यावर अपघात वाढले असून मागच्या तीन महिन्यात याच रस्त्यावरील हा दुसरा अपघाती मृत्यू आहे.