पणजी : गोवा राज्य जैवविविधता मंडळाच्या वतीने यंदा जागतिक जैवविविधता दिन उत्साहात साजरा करण्यात येणार आहे. यानिमित्त तीन दिवस भरगच्च कार्यक्रमांचे आयोजन केल्याची माहिती मंडळाचे सचिव प्रदीप सरमोकादम यांनी दिली. या कार्यक्रमास विशेष पाहुण्या म्हणून बीजमाता पद्मश्री राहीबाई पोपेरे उपस्थित राहणार असून त्यांचे बीजभाषण होणार आहे.

याशिवाय केंद्रीय पर्यावरण, वन आणि हवामान बदल मंत्री भूपेंद्र यादव, केंद्रीय पर्यावरण, वन आणि हवामान बदल राज्यमंत्री अश्विनी कुमार चौबे यांच्या उपस्थितीत नेवरा येथे विविध कार्यक्रम होणार आहेत. सरमोकादम म्हणाले की, यंदा जागतिक जैवविविधता दिन 21 ते 23 मे या कालावधीत साजरा केला जाणार आहे.

21 मे रोजी सकाळी 6.30 ते 9 पर्यंत कळंगुट, कोलवा किनाऱ्यांवर स्वच्छता मोहीम होईल. 22मे रोजी जैवविविधता दिन कार्यक्रमासाठी प्रमुख पाहुण्या म्हणून महाराष्ट्रातील अहमदनगर येथील बीजमाता पद्मश्री राहीबाई सोमा पोपेरे यांना निमंत्रित केले असून त्यांचे बीजभाषण होईल. यावेळी पर्यावरण मंत्री नीलेश काब्राल आणि इतर मान्यवरांंची भाषणे होतील.

राष्ट्रीय स्तरावरील कार्यक्रम

23 मे रोजी राष्ट्रीय स्तरावरील कार्यक्रम होणार असून यात केंद्रीय मंत्र्यांसह केंद्रीय सचिव अरुण कुमार मिश्रा, राष्ट्रीय जैवविविधता प्राधिकरणाचे अध्यक्ष रेड्डी, पर्यावरण मंत्री नीलेश काब्राल, केंद्रीय पर्यटन राज्यमंत्री श्रीपाद नाईक आणि मुख्यमंत्री डॉ. प्रमोद सावंत यांची भाषणे होतील.