काणका-म्हापसा येथील साईबाबा मंदिराजवळील रस्त्यावर जुनाट वीजखांब बदलण्याच्या कामावेळी खांबावर चढलेल्या झारखंडमधील भालेश्वर कुमार राठोड (३२) या मजुराचा खाली पडून दुर्दैवी मृत्यू झाला, ही घटना गुरुवारी (27 जून) दुपारी घडली.

हाती आलेल्या माहितीनुसार, जुनाट काणका येथे साईमंदिराजवळ वीजखांब बदलण्याने काम सुरू होते. यावेळी त्या खांबावरील विद्युत तारा मोकळ्या करण्यासाठी भालेश्वर राठोड हा कामगार खांबावर चढला होता.

त्याचवेळी दुर्दैवाने तो खांब मुळातून उन्मळून खाली कोसळला. त्याबरोबरच वर चढलेला कामगारही खाली पडला.

त्याच्या डोक्याला गंभीर दुखापत झाल्याने त्याला इस्पितळात नेत असतानाच वाटेत त्याचे निधन झाले. पोलिसांकडून प्रकरणाचा पुढील तपास सुरू आहे..