Goa Mineral Transportation Issue

डिचोली: खनिज वाहतुकीच्या प्रश्नावरून डिचोलीत पुन्हा एकदा गुंता निर्माण झाला असून बाहेरील कंत्राटी ट्रकांना स्थानिक ट्रकमालकांनी विरोध केला आहे. दरम्यान, खाणीशी संबंधीत प्रश्न जाग्यावर घालण्यासाठी प्रयत्न चालू आहेत, असे वेदांता कंपनी व्यवस्थापनाने स्पष्ट केले आहे.

खनिज वाहतूकप्रश्नी आज (मंगळवारी) सायंकाळी आमदार डॉ. चंद्रकांत शेट्ये आणि प्रेमेंद्र शेट यांच्याबरोबर डिचोली ट्रकमालक संघटनेची एक बैठक झाल्याची माहिती मिळाली आहे. ट्रकमालकांच्या आक्रमक भूमिकेमुळे बैठकीतील वातावरण काहीसे तापल्याची माहिती मिळाली आहे.

खनिज वाहतुकीसाठी बाहेरील ट्रक नकोच अशी भूमिका या बैठकीत ट्रकवाल्यांनी मांडली आहे. याप्रश्नी तोडगा काढण्याची ग्वाही आमदारांनी ट्रकवाल्यांना दिल्याची माहिती मिळाली आहे. याप्रश्नी कंपनी व्यवस्थापन आता कोणता निर्णय घेते, त्याकडे स्थानिक ट्रकवाल्यांचे लक्ष लागून राहिले आहे.

खनिज वाहतूक बंद

खनिज वाहतुकीसाठी बाहेरील दहाचाकी ट्रकांना कंत्राट दिल्याने स्थानिक ट्रकमालक अस्वस्थ बनले आहेत. कालपासून वेदांताच्या खाणीवरील खनिज वाहतूकही बंद ठेवण्यात आली आहे.

प्रश्न मार्गी लावणार

डिचोली खाण ब्लॉक-१ अंतर्गतच्या खाणीशी निगडीत असलेल्या घटकांचे प्राधान्याने आर्थिक हित जपण्यासाठी कंपनी बांधील आहे, असे ‘वेदांता’ व्यवस्थापनाने स्पष्ट केले आहे. कामगार आणि अन्य संबंधीत मिळून ९०० हून अधिकजण आणि दीडशेहून अधिक ट्रक खाणीवर अवलंबून आहेत. खनिज वाहतूक आणि अन्य खाणीशी निगडीत प्रश्न संबंधितांना विश्वासात घेऊन मार्गी लावणार, असे कंपनीने स्पष्ट केले आहे.