डिचोली: डिचोली शहरातील व्हाळशी येथील तळ्यात दहशत घातलेल्या मगरींपैकी आणखी एक मगरीचे ‘पिल्लू’ सापळ्यात (पिंजरा) अडकले. वन खात्याने तळ्यात लावलेल्या सापळ्यात (पिंजरा) मगरीचे हे पिल्लू अडकल्याचे शुक्रवारी पहाटे स्थानिकांच्या निदर्शनास आले.

मगरीचे हे पिल्लू साधारण दीड फूट लांबीचे आहे. या पिल्लाची बोंडला अभयारण्यात रवानगी करण्यात आली आहे, अशी माहिती मिळाली आहे. दरम्यान, दोन दिवसांच्या आत तळ्यात मगरीची दोन पिल्ले पकडण्यात आल्याने स्थानिक लोकांनी सुटकेचा श्वास घेतला आहे.

तरी या तळ्यात मगरींच्या आईसह आणखी दोन ते तीन मगरीची पिल्ले असल्याचा दावा काही नागरिकांनी केला आहे. त्यामुळे लोकांमध्ये निर्माण झालेली भीती अजूनही कायम आहे. तळ्यात आणखी मगरी असल्याने तळ्यात लावलेला सापळा तसाच ठेवण्यात आला आहे. या तळ्यातील तळे मगरींपासून कधी मुक्ती मिळते त्याची व्हाळशीवासीयांना प्रतीक्षा लागून राहिली आहे.

दोन्ही मगरींची रवानगी बोंडलात

दोन दिवसांपूर्वी या तळ्यातील एक मगर सापळ्यात अडकली होती. बुधवारी पहाटे ही मगर पिंजऱ्यात अडकल्याचे दिसून आले होते. त्यानंतर वन खात्याच्या पथकाने या मगरीला ताब्यात घेऊन तीची बोंडला येथे रवानगी केली होती.