ATM Security in Bicholim: राष्ट्रीयकृतसह बॅंकांसह डिचोलीतील अनेक बँका सुरक्षा व्यवस्थेच्या बाबतीत ढिल्या असल्याचे आढळून येत आहे.

डिचोलीतील बहुतेक बँकांचे ‘एटीएम’ कक्ष पोलिस पाहणीनंतर काही ठिकाणी सुरक्षा रक्षकच नसल्याने असुरक्षित असल्याचे निष्पन्न झाले आहे. गेल्यावर्षी केरी येथील एका राष्ट्रीयकृत बँकेतील दरोड्याच्या घटनेनंतर पोलिसांनी केलेल्या पाहणीनंतर तसे स्पष्ट झाले आहे.

राज्यातील ‘एटीएम’ कक्ष फोडण्याच्या घटना पाहता बँकांसह एटीएम कक्षांकडे सुरक्षा व्यवस्था तैनात ठेवणे आवश्यक बनले आहे. डिचोली तालुक्यात ५० हून अधिक एटीएम कक्ष आहेत. काही कक्ष संबंधित बँकांना जोडूनच तर काही कक्ष बँकांपासून दूर अंतरावर बसस्थानक वा अन्य मोक्याच्या ठिकाणी आहेत.

मोजक्याच ‘एटीएम’ कक्षाच्या ठिकाणी सुरक्षा रक्षक दिसून येतात. तर सुरक्षा रक्षक नसल्याने बहुतेक कक्ष असुरक्षित बनले आहेत. रात्रीच्यावेळी तर हे 'एटीएम' कक्षांची सुरक्षा 'राम भरोसे' ठरत आहे.

सीसीटीव्ही कॅमेऱ्यांबाबतही प्रश्‍नचिन्ह !

काही एटीएम कक्षातील सीसी टीव्ही कॅमेरे कार्यरत आहेत की नाहीत, त्याबद्दलही प्रश्नचिन्ह निर्माण होत आहे. सुरक्षा व्यवस्थेअभावी रात्रीच्यावेळी अत्यावश्यक असतानाही पैसे काढण्यासाठी ‘एटीएम’ कक्षात जाणे धोकादायक बनले आहे.

डिचोलीत यापूर्वी एक-दोन वगळता एटीएम फोडण्याच्या मोठ्या घटना घडलेल्या नाहीत. तरीही राज्यातील घटना पाहता, भविष्यात चोरट्यांच्या टोळीकडून डिचोलीतील बँका आणि एटीएम कक्ष ‘टार्गेट’ होण्याची शक्यता नाकारता येत नाही.