डिचोली: डिचोलीतील आमठाणे धरणावरील ‘गेट’ आदी दुरुस्तीचे काम निश्चित केलेल्या वेळेत पूर्ण झाले नसल्याने धरणातील जलसाठा करण्याचे काम आता लांबणीवर पडल्यातच जमा आहे.

त्यामुळे सध्या ९० हून अधिक टक्के कोरडे पडलेले धरण भरण्यास आणखी काही दिवस तरी प्रतीक्षा करावी लागणार आहे. मुख्यमंत्र्यांसह जलसंपदा खात्याच्या मंत्र्यांकडून दुरुस्तीकाम जुलै महिन्याच्या अखेरपर्यंत पूर्ण होऊन धरणात पाणी साठवण्यास सुरवात करण्यात येईल असा ठाम विश्वास व्यक्त करण्यात आला होता.

मात्र, जुलै महिना संपला, तरी दुरुस्तीचे काम निश्चित वेळेत पूर्ण झालेले नाही. त्यामुळे आमठाणे धरण अद्याप कोरडेच आहे. कोणत्याही व्यत्ययाशिवाय दुरुस्तीकाम सुरळीतपणे करायला मिळाले, तर हे काम पूर्ण होण्यास आणखी किमान १५ ते २० दिवस लागण्याचा अंदाज आहे.

त्यामुळे ऑगस्ट महिन्याच्या अखेरीस धरणातील जलसाठा पूर्वपदावर येण्याची शक्यता आहे. दरम्यान, दुरुस्तीकाम शक्य तितक्या लवकर पूर्ण करण्यासाठी जलसंपदा खात्याचे अभियंते जातीने लक्ष ठेवून आहेत.