पणजी: डिचोली येथे २०१३ मध्ये पत्नीची हत्या केल्याप्रकरणी दोषी ठरवून आजन्म कारावासाची शिक्षा सुनावलेल्या मनोहर केतकर (५५) याची शिक्षा गोवा खंडपीठाने निर्दोष मुक्तता केली.

गुन्हा सिद्ध करण्यासाठी पुरेसे पुरावे नसल्याने तसेच सादर केलेले पुरावे अपूर्ण असल्याचे निरीक्षण नोंदवत न्यायालयाने हा निवाडा दिला. न्यायमूर्ती श्रीराम शिरसाट व न्यायमूर्ती वल्मिकी मिनेझिस यांच्या खंडपीठाने म्हापसा येथील अतिरिक्त जिल्हा व सत्र न्यायालयाने ऑगस्ट २०२४ मध्ये दिलेला दोषसिद्धीचा निर्णय रद्द केला.

१८ नोव्हेंबर २०१३ रोजी लाडफे (डिचोली) येथील नेस्ले कारखान्याजवळील शेडमध्ये मनिषा केतकर मृतावस्थेत आढळली होती. शवविच्छेदन अहवालात मृत्यूचे कारण ‘गळा दाबून झालेली गुदमरल्याची स्थिती’ असे नमूद करण्यात आले होते. या प्रकरणात प्रत्यक्षदर्शी साक्षीदार नसल्याने संपूर्ण खटला परिस्थितीजन्य पुराव्यांवर आधारित होता.

१७ नोव्हेंबरच्या रात्री मनोहर व मनिषा एकत्र होते, हे मान्य असले तरी दुसऱ्या दिवशी सकाळी ते दोघे एकत्र बाहेर पडले, याबाबत कोणताही ठोस पुरावा नसल्याचे न्यायालयाने स्पष्ट केले. मनिषाने कुटुंबीयांना ‘नोकरीसाठी आरोपीने बोलावले’ असे सांगितल्याचा उल्लेखही न्यायालयाने ऐकीव ठरवत फेटाळला.