Bhumika Temple Dispute

सत्तरी: पर्येतील श्री भूमिका देवस्थानाच्या कालोत्सवावरुन महाजन आणि सेवेकरी यांच्यात झालेल्या वादाला हिंसक वळण लागले आहे. अडवून ठेवलेल्या संतप्त भाविकांनी पोलिसांवर खूर्च्या भिरकावण्यासह देवस्थानाबाहेर दगडफेक केल्याचे समोर आले आहे. या दगडफेकीत २५ जण जखमी झाल्याची प्राथमिक माहिती मिळतेय.

भूमिका देवस्थानात आज म्हणजेच (१५ जानेवारी) कालोत्सव साजरा होणार होता. यावरुन गावंकर आणि राणे समाज समोरा समोर आला. पोलिसांनी दोन्ही समाजांना मंदिराच्या गर्भकुडीत प्रवेश करण्यापासून रोखले. यात मोठ्या प्रमाणावर महिला समोर आल्या त्यांना थोपवताना पोलिसांची पूरती दमछाक झाली. दरम्यान, संतप्त लोकांनी पोलिसांवर खूर्च्या भिरकवल्या तसेच मंदिराबाहेर दगडफेकही केल्याचे सांगितले जात आहे.

यात कालोत्सवासाठी आलेल्या भाविकांसह इतर असे २५ जण जखमी झाले आहेत. पोलिस सध्या घटनास्थळी परिस्थिती नियंत्रणात आणण्यासाठी प्रयत्न करत आहेत. मंदिरात आज कालोत्सव आणि १६ जानेवारी रोजी गवळण साजरी होणार आहे. दरम्यान, गावकर समाजाने त्यांच्या मागण्यांसाठी मंदिरातच ठिय्या मांडला आहे.

वादाची पार्श्वभूमी लक्षात घेता श्री भूमिका मंदिर आणि परिसरात पोलिसांनी मोठा बंदोबस्त तैनात केला होता. सकाळपासून या भागात तणावपूर्ण परिस्थिती पाहायला मिळत आहे. दोन्ही गट आक्रमक झाल्याने पोलिसांना परिस्थिवर नियंत्रण मिळवण्यासाठी प्रयत्नाची पराकाष्ठा करावी लागत आहे.