Murder Case: बेताळभाटी येथे राहणारे डॉक्टर निर्वाण भारत यांचा खून केल्यानंतर त्यांचीच गाडी घेऊन फरार झालेल्या त्या चार संशयितांनी वाटेत वेगवेगळ्या ठिकाणी थांबून डॉक्टरांचे एटीएम कार्ड वापरून पैसे काढले, अशी माहिती पुढे आली आहे. ही एकंदर रक्कम 60 हजारांच्या आसपास असल्याची माहिती सूत्रांनी दिली.

पोलिसांनी त्यांना अटक केल्यावर त्यापैकी 50 हजारांची रक्कम जप्त केली असून त्यांनी चोरलेली गाडी, लॅपटॉप आणि चोरलेले मोबाईल्सही जप्त केले आहेत. मिळालेल्या माहितीनुसार, सिमांचल परिदाला डॉक्टरच्या एटीएम कार्डचा पीन क्रमांक माहीत होता.

संशयितांविरोधात गुन्हे नोंद

कोलवा पोलिसांनी आता या संशयितांच्या विरोधात खुनाच्या (कलम 302) आरोपाबरोबरच कटकारस्थान (कलम 120-ब) रचणे आणि जबरी चोरी (कलम 392) करणे, असे अतिरिक्त गुन्हे नोंद केले आहेत. सध्या हे चारही संशयित कोलवा पोलिसांच्या कोठडीत आहेत.