बेले-नावेली येथे जंक्शनवर उभारण्यात येणाऱ्या मोबाईल टॉवरला स्थानिकांनी कडाडून विरोध दर्शविला आहे. टॉवर उभारून झाला, तरी स्थानिकांची न्यायालयीन लढाई सुरूच आहे.

रविवारी स्थानिकांनी मोबाईल टॉवरची पाहणी केली, त्यावेळी अविता लोबो यांनी सांगितले की, सुरुवातीला येथे सार्वजनिक बांधकाम खात्याचे काम सुरू आहे, असा बोर्ड लावण्यात आला होता.

परंतु रात्रीच्या वेळी येथे मोबाईल टॉवरची कंपनी काम करीत असे. शिवाय त्यांना महिला व पुरुष पोलिसांचे संरक्षण देण्यात आले होते, असे लोबो यांनी सांगितले.

आता या विषयावर उच्च न्यायालयात 7 एप्रिल रोजी सुनावणी होणार असून कंपनीला सर्व कागदपत्रे सादर करण्यास सांगितले असल्याचे स्थानिक रहिवासी बेंतो डिसिल्वा यांनी सांगितले.

हा प्रश्र्न स्थानिक आमदारांकडे उपस्थित केला होता. त्यांना आम्ही निवेदनसुद्धा दिले आहे. मात्र, सध्याच्या परिस्थितीत आपण काहीच करू शकत नाही, असे आमदारांनी आम्हाला सांगितल्याचे डिसिल्वा यांनी सांगितले.

न्यायालयाचीही केली दिशाभूल

बेंतो डिसिल्वा म्हणाले की, सुरुवातीला येथे साधा खांब उभारणार, असे सांगण्यात आले होते. उच्च न्यायालयातसुद्धा त्यांनी खोटेपणा केला आहे. न्यायालयातही त्यांनी साधा खांबच उभारणार, असे सांगितले. हा मोबाईल टॉवर इंडस टॉवर कंपनीने उभारला आहे.

एरव्ही त्यांना सर्वे नंबर 68/11 मध्ये परवानगी दिली होती. प्रत्यक्षात त्यांनी सर्वे नंबर 68/09 मध्ये टॉवर उभारला आहे, असे बेंतो डिसिल्वा यांनी सांगितले.