मडगाव: रेल्वेतून सर्रास गोव्यात परराज्यातून बीफची तस्करी होत असताना, यात गुंतलेले माफिया मात्र अजूनही मोकाट आहेत. पोलिसांचे हात अजून त्यांच्यापर्यंत पोहचू शकलेले नाहीत. पुरवठादाराचा माग काढणे पोलिसांना शक्य झालेले नाही.

या तस्करीत गुंतलेल्या माफियांचे जबरदस्त नेटवर्क असून मांडवली करण्यातही ते माहीर आहेत. जेथून मालाची डिलिव्हरी केली जाते तेथे सर्व आधीच सेटिंग केलेले असते. बिनधास्त माल गोव्यात पाठविला जातो हे आता उघड होऊ लागले आहे. 

गोवा हे जागतिक पर्यटन स्थळ असून येथे बीफला मोठ्या प्रमाणात मागणी आहे. मागणी तसा पुरवठा होत नसल्याने आता बीफची तस्करी होऊ लागली आहे. यावर्षी दोनदा कोकण रेल्वे पोलिसांनी रेल्वेतून आलेले बीफ जप्त केले आहे. दिल्लीहून हजरत निजामुद्दीन एक्स्प्रेस रेल्वेतून मडगाव रेल्वे स्थानकात  पार्सलमधून आलेले १ लाख ५४ हजार रुपये किमतीचे बीफ या पोलिसांनी जप्त केले होते.

चिकनचे लेबल लावून हा माल पाठवून दिला होता. या मालाची डिलिव्हरी घेण्यासाठी आलेला फय्याज अहमद मोहम्मद हनीफ याला पोलिसांनी अटक केली होती. सध्या तो जामिनावर आहे. या प्रकरणाचा पुढील तपासासाठी पोलिसाचे एक पथक दिल्लीला गेले होते. तेथील रेल्वे पार्सल कार्यालयाच्या बड्या अधिकाऱ्यांची या पोलिसांनी चौकशी केली. मात्र ठोस माहिती काही त्यांना मिळू शकली नाही. 

दुसऱ्या एका घटनेत शेजारच्या कर्नाटक राज्यातील बेळगावहून गोवा एक्स्प्रेस रेल्वेतून शेळीचे मास असे भासवून बीफ पाठवून देण्यात आले होते. मडगाव रेल्वे स्थानकावर नंतर ते जप्त करण्यात आले होते. ३४७ किलो ते मास होते. या प्रकरणी अजूनही पोलिसांना कुणीही सापडू शकला नाही. एका वरिष्ठ पोलिस अधिकाऱ्याने दिलेल्या माहितीनुसार ज्या ठिकाणाहून बीफ पाठविले जाते, तेथे सर्व काही आधीच सेटिंग झालेले असते. आम्ही माल जप्त करून, पुढील तपास सुरु केला तरी आम्हाला तेथून पूर्ण सहकार्य मिळत नाही.